膠尾托iPhone

iPhone 5轉咗新Lightning插頭，之前買落嘅充電線、底座都用唔着，好在呢條iPhone「尾」就無問題！呢條叫Mobile Tail嘅產品其實一啲都唔新，係兩年前韓國出品，但筆者後知後覺，早排去韓國先見到，即買！呢條「尾」設計好簡單，只係一個吸盤加一條長長的膠尾，只要吸喺iPhone機背就可以用條「尾」當成支撐點固定擺在枱面睇面書或睇短片，有創意啲仲可以將條尾插落iPhone的耳機孔入面添！大概$70港紙一條膠「尾」抵唔抵？自我感覺良好咪得囉！

Brian Reporter

愈踩愈深

以前用個靚聲少少嘅一粒單元咁大把耳機聽iPod，已好滿足。點知有人借咗個雙單元耳機畀筆者試聽，即刻覺得以前個耳機唔掂。咁點算好？我嘅做法，就係買隻靚聲過雙單元嘅耳機囉！仲要一不做二不休，整夠四單元畀耳仔歎吓，嘩！啲聲有層次到呢……當本人都以為故事已經完結之際，又有人畀咗個發燒級耳擴過我試聽……唉！氹，只會愈踩愈深。

Tony Editor

雙重薄荷味

早前去了登打士街某某Cafe，已經唔記得間舖頭叫咩名，之後點了一杯薄荷朱古力，仲要求重薄荷，點知真係「出事o架嘛」！味道的確係重薄荷，仲要Double上，雖然間舖頭滿足到我的要求，但完全蓋過朱古力味，唔講仲以為自己飲緊薄荷水，結果都係成杯飲晒，不過成口都係薄荷味，要刷兩次牙先可以刷走嗰股清新的感覺。

Jason Reporter

毋須按跳播的大碟

小記買咗近20年來首隻CD—曲婉婷個人大碟《Everything in The World》。電影《春嬌與志明》裏面的兩首插曲《Drenched》及《我的歌聲裏》固然動聽，編曲更與電影情節相配合，一邊收聽，張志明與余春嬌的一幕幕片段又浮現腦海，是聲畫的一次完美結合。除此之外， 《Anxiety》及《Jar of Love》也值得推薦，一首陰沉，一首輕快，無論失戀定熱戀都照顧得到。不是賣廣告，這是一張毋須按跳播掣的精彩大碟，你唯一要按的是重播，把美妙樂韻聽出耳油為止。

Gilbert Reporter

長你少少

話說男人普遍對尺寸這回事特別在意，所以對用開iPhone 4S的小記來說，見身邊人人轉用屏幕又大又靚的Samasung Galaxy Note，感覺就好像自己仲用緊顯像管電視，但其他人就已轉睇16：9全高清電視一樣，不是味兒感從喉頭湧上。因此，小記誓要撳爛F5鍵，都要搶部長少少的iPhone 5，而且仲買埋個iWALK出品的iPhone 5保護套，貪佢青青綠綠夠搶眼，等全世界都知道我部iPhone長你少少。

Angus Reporter