泰國實攝 到此一遊照片

不少人趁十月份公眾假期去旅行減吓壓，而旅行又點可以唔影相呢？無論你用手機抑或相機，去到外地有幾樣嘢都值得去影，唔影的話，就等同冇去過一樣。今次筆者就帶埋Panasonic Lumix LX7遠赴泰國，貪佢有F1.4大光圈同ND濾鏡，日用定夜用都咁掂。

站在高點看夜色

大城市總有個位處高點的地標，例如香港的天際100、台北101等，畀大家可以一覽整個城市，唔影「到此一遊」就少咗話題了。構圖時，最好附近有幾棟高樓大廈襯托，點解？原因很簡單，要有幾棟高樓映襯到你居高臨下；至於拍攝時間應選黃昏或夜晚，因為夜景往往吸引過日景，朋友畀Like都會多啲。

構圖影建築

筆者早前去泰國，當地最多就係廟宇和神佛，拍攝建築和地標其實都係睇天做人，運氣好遇上藍天可以令張相加分，調校日光的白平衡，能令相片傾向冷調，讓天空變得更藍；如果遇唔到藍天，就要想辦法由構圖入手。

抓拍人文風光

外地的生活習慣都值得我們拍攝，如果你係「Snapshot流」，唔鍾意規限拍攝方式，就更加一定要影當地的風土人情。影人文風光的作品常獲很高的評價，因為作品內容少見，感覺一定新鮮，而Snapshot的竅門就係要快、狠、準，拍攝時唔可以有半點猶豫，而且動作要迅速，對方一旦發現你正在拍攝，多數會顯得拘謹甚至迴避鏡頭，無法自然流露。

食物最緊要夠鮮

開餐前相機先食，係港式的「飲食文化」，我們亦可以將呢種「文化」帶到外地，無論去高級餐廳擦大餐，抑或街邊檔掃街，都記錄一番，就算唔記得咩味，都記得食過咩落肚。影的時候應該將飽和度提高，出來的效果色彩鮮艷，務求做到色、香、味之中的「色」，令人睇到都流口水，再加上斜斜的角度先至有Feel，四平八穩的構圖實在太沒趣了。

查詢：2833 0955