借張梳化瞓勻全球

去旅行想節省住宿費，除了向青年旅館進發，亦可考慮借宿他人家。Couch-surfing梳化借宿於歐美盛行已久，除了是驢友的慳家恩物，亦為旅行發燒友提供文化交流的好機會；隨梳化客身份附送的獨家體驗，就連福布斯富豪也未必買到！想知道呢種另類住宿體驗點運作？由達人Alexander Lee（阿大）親身講解，更附送溫馨提示，瞓梳化極速上手！

Couch-surfing逐格睇

第1步　註冊

要瞓梳化，首先要去官方組織www.couchsurfing.org登記成為會員，為推廣「再窮都可以去旅行」及「另類旅遊體驗」，入會費全免。

溫馨提示︰成為會員費用全免，但註冊時會出現住址及身份驗證頁面，要求你以信用卡網上付款，提高個人資料的可信性，注意該程序是自願的，不付款也可以繼續註冊。

第2步　填寫詳細Profile

兩個（或更多）陌生人素未謀面，要決定是否放人入屋，Host（梳化主人）主要靠Surfer（梳化客）提供的Profile，其實只係年齡、性別、職業、語言及旅遊經驗等基本而又可以提供初步印象的資料，好增加大家見面前的基本認識。

溫馨提示︰Profile的作用，其實同剛相識的朋友作自我介紹一樣，愈詳細反映你愈有誠意。

第3步　開始搜尋梳化位

完成Profile，就可以用「Surf」按鈕以目的地搜尋Host，再從結果列表中揀選「意中人」，但千萬不要心急，記得Click入去睇Profile全相，細閱對方所寫的借宿條件等，一來保障自己安全，二來可以再次確定「意中人」身份。別以為Couch-surfing只適用於旅遊城市，記者試搵過連平壤都有人願意借出梳化，當然，能否入境就閣下自理啦！

溫馨提示︰（1）注意！2009年曾有本港女Surfer於英國借宿期間，被摩洛哥男Host強姦，至今網上部分男性Host仍寫明只招待女Surfer，基於安全理由，不建議挑選。（2）細閱Profile時，記得留意References一欄，是留宿過的Surfer或接待過的Host之留言及評語，評級有Positive（正面）、Neutral（中立）和Negative（負面），只要有Neutral和Negative的，都值得重新考慮。

第4步　發送借宿請求

即係咁，你揀人時人揀你，要讓心儀的Host知道你的心意，就要發送Request，除了介紹自己，仲要講吓點解想借宿對方梳化，覺得對方有乜嘢引起你興趣，或者大家有何共同話題之類。記住！Couch-surfing唔止係免費住宿，更重要係一個交友體驗，所以Host願唔願意收留你，好多時取決於誠意同啱傾程度，Request寫成點，就係誠意的反映，建議當中可以提及共同興趣，以示你有用心睇過佢個Profile。

溫馨提示︰（1）注意！Profile要達到一定完整程度方可以發送請求，所以在計劃借宿前先乖乖做功課。（2）對於新手來說，Request更為重要，因為欠缺References，Host只能憑Request決定是否接收這個Surfer。（3）到達目的地前2至3星期開始搵梳化最好，太早的話，Host未必知自己的Schedule，太遲又可能覆唔切。（4）如有大件行李（阿大在歐洲踩單車流浪，去到邊都要留個車位），記得預先說明。

進佔梳化

一輪溝通後，終於可以好好體驗不一樣的旅程。部分Host對梳化客十分信任，會留低鎖匙，甚至自己出門，留低間屋畀Surfer，不過記得自律，切勿辜負別人的信任。雖然沒有明文規定，但Surfer一般都會作出貢獻，答謝招待，阿大就喜歡煮中國菜招呼新朋友，因為食物是很好的文化交流方式之一。

About阿大

《擁抱伊朗》的作者，剛完成9個月單車歐洲流浪之旅，Couch-surfing經驗遍布歐洲、非洲、澳洲及亞洲，獲幸運之神眷顧，借宿環境經常比Hostel豪華，更多次遇上好客Host，變身導遊不特止，更招待每日3餐Fine Dining，令捱慣麵包的他深受感動。

（部分相片由受訪者提供）