藏版王祖藍

估唔到喺西藏咁遠，竟然撞到「明星」！早前暢遊林芝直白的大峽谷景區，便巧遇藏版王祖藍，他是景區內的講解員，無論身形和身高都跟正版王祖藍差不多，團友十個有九個都覺得佢勁似，剩下的一個就話：「我接受唔到囉！」沿途這位藏版王祖藍除了認真講解外，還一顯「祖藍」本色，講吓爛Gag，逗得大家鬼咁開心。唔止翻版港星，另外還遇上一位藏版反町隆史，他紮起條辮，遠睇似十足當年拍《Beach Boy》咁型，搞到不少女團友都爭住和他合照。

Konnie Reporter

別了Hey！Hey！Hey！

90年代迷過J-pop的朋友，總會聽過或睇過《Hey！ Hey！ Hey！Music Champ》，這個94年由日本富士電視台炮製的音樂節目，由組合Downtown以搞笑風格作弄來賓，成為90年代人氣節目之一。可惜近年J-pop熱潮已大不如前，這個有18年歷史的音樂節目，剛宣布將於今年內畫上句號，不捨得之餘，也勾起我當年放學蒲信和租帶睇的快樂回憶。

Chiu Reporter

大腳飛屐

記得《逃學威龍》最後一幕，周星馳諷刺地說最後擲槍擊中罪犯一招，竟是從學校擲粉刷學到……原來最實用的招式，往往藏於日常生活中。最近日本鳥取的妖怪橫町，就有個別開生面的「踢飛屐鬥遠」比賽，人人穿上鬼太郎件橫間背心，然後拚老命一踢，聽聞大會紀錄是40.29米，計我話香港上水居民一定可以破紀錄，事關只要他們一想起每天在火車站阻住上落車的水貨客，便恨不得兜腳把這班「街霸」踢返內地。

Dick Lau Reporter

泰山Q貓

龍年真係好多朋友生BB，Facebook日日都見到幾張BB相，等我都影番一張先！這隻躲在泰山上嘅小貓，是我登泰山行到氣來氣喘時，在山邊小食店遇見的，當時正值炎夏，店舖無冷氣又無舒服梳化讓我坐下慢慢品嘗食物，但見到貓仔玩枱底張爛膠紙自得其樂的樣子，心情立即靚晒，充滿力量繼續上路去。

Boris Reporter