iPhone 5行貨實測4G、Siri有料到

當你睇緊呢篇報道嘅時候，小記已經撳爛咗鍵盤個F5鍵，力爭明早8點鐘去Apple Store買機嘅機會！無錯，iPhone 5今日接受網上預訂，「幸運兒」可能就係你。小記就好好彩，快大家一步攞到部行貨新機測試，4吋機身比想像中輕薄得多，最驚喜就係香港嘅4G LTE制式超快，仲有搞鬼爆趣嘅廣東話Siri；唔買唔緊要，過兩日唔好呻笨就得喇！

屏大身細 歷代之冠

有人稱iPhone 5係iPhone 4「加長版」，毀譽參半，由iPhone 3G開始成為果迷嘅小記最初都有少少失望。不過實機攞上手又加番分喎！4吋屏幕男仔單手仍然可以掂到屏幕嘅左右上角，大細適中。最難得係機身雖然係歷代iPhone中最大部，但112g重量及7.6mm厚度卻係歷代最輕薄，攝落衫袋、褲袋都輕鬆得多。而今次測試嘅機款雖然係黑色，不過仍然見到精細造功，前後邊框據講用上鑽石切割，光線之下就會閃令令，好高貴；機殼背面仲加入磨沙處理，唔似得iPhone 4/4S咁易黏手指模。

4G用得着 SIM卡唔剪得

唔少朋友都準備上台出iPhone 5，用唔用得着新機嘅4G LTE制式係關鍵。香港行貨iPhone 5就支援1,800MHz頻譜，好彩大部分嘅本地網絡商都有相關頻譜，支援應該唔成問題。實測時，插入數碼通SIM卡已經可以成功認到4G LTE網絡，再用《OFCA》軟件測試速度，一般下載速度都有成20Mbps，睇片、上網嘅載入時間都快得多，提速效果都幾明顯！不過要留意，因為新機改用新制式嘅nano-SIM卡，體積比iPhone 4嘅microSIM又細咗44%，就連晶片擺位都唔同晒，剪卡都用唔到，所以新用家一定要上台換SIM先得。

廣東話Siri 妙問妙答

至於Siri功能，嚟到iPhone 5已經全面支援中文語音輸入，最緊要係粵語都認得到！雖然把合成女聲唔多動聽，不過辨識率高達八成，好似問「依家幾多點」、「嚟緊英超賽程」等，佢都答得到；不過定位功能就差少少，除咗「我依家喺邊」答到之外，問佢附近有咩餐廳、銀行都答唔出，資料庫要再加強喇！試玩期間，都不乏有過癮對答，好似「9月1日係我生日」，Siri就會唱中文生日歌畀你聽；問「你係男定女」，佢又識得寸你「同你有咩關係」。雖然得啖笑居多，不過確實幾地道嘅！

Earpod型仔 Lightning耐用

仲記得發布會當日，Apple話新版耳筒Earpod用咗三年時間做研發，齋睇樣確實幾型仔；估唔到開箱仲有驚喜，耳筒竟有個專用嘅透明盒包裝，似足要額外購買嘅入耳式耳筒。試聽音樂，發現分析力比舊版好得多，低音、高音的層次都更為明顯，比一般跟機耳筒高幾班；美中不足是隔音能力較差，去到嘈啲嘅地方都會受環境雜音所影響。唔單止耳筒轉新，連接介面都由30針接頭改為Lightning接頭，官方表示新插頭會比30針更耐用，又可以雙面使用；而小記就比較關心充電速度，結果充電一小時後，電量由2%回復至69%，充電速度同以前差唔多，以Smartphone嚟講都算充得好快！

全景效果好 地圖未足料

而拍攝功能方面，鏡頭像素雖然維持800萬像素，不過就改用升級版嘅iSight鏡頭，據講可以減低雜訊。小記試影過，覺得成像同4S年代其實相差無幾，反而新增嘅全景模式就值得一讚；話就話AppStore有唔少全景Apps畀你玩，不過iPhone 5全景模式嘅駁相功力就高得多，放大咗駁位都唔多覺眼，而且儲存時間只需大概一秒左右，影風景一流！地圖方面，由iOS 6問始，正式由Google Maps轉用Apple Maps，雖然加入超過癮嘅3D地圖以及汽車語音導航，不過前者只限部分地區及國家，香港就仲未有相關資料，最可惜是地圖資料未盡完善，以香港為例，好多橫街、地標都冇顯示出嚟，亦冇街景服務，搵路靠唔住！期望日後地圖資料會盡快更新，或將Google Maps App擺上AppStore畀大家下載。

佢哋點睇：炒機達人Lo哥：未必抄得起！

G-World負責人劉志剛（Lo哥）表示：「香港屬首批開賣地方，如果Apple Store、網絡商甚至電器連鎖店都有得賣嘅話，就未必炒得起；就算炒都係得第一水，16GB版本的回收價預計可以去到$7,000至$7,500。由於新機用nano-SIM，唔可以剪卡，內地未必用到，肯定會影響需求。」

DJ阿Bob：我畀85分！

小記搵嚟字正腔圓嘅DJ阿Bob（林盛斌）試玩廣東話Siri，試問「今日嘅氣溫同濕度」竟然認咗「今日嘅氣溫同濕布」，Siri仲叫阿Bob「麻煩你字正腔圓擘大個口講多次」，認真搞笑！阿Bob玩完部新機就話畀85分，讚新機靚仔又醒目，處理器明顯快咗，但係Siri唔實用，地圖資料又未夠詳盡。

iPhone 5 SPEC

處理器：A6

顯示屏：4吋Retina Display Multi-Touch屏幕（1,136×640解像度）

鏡頭：800萬像素iSight鏡頭（後置）、120萬像素FaceTime HD鏡頭（前置）

制式：GSM四頻

通話時間：8小時（3G）

備用時間：225小時

上網時間：8小時（3G/4G LTE）

操作系統：iOS 6

體積：123.8×58.6×7.6mm

重量：112g

查詢：800 908 988