中文行版N3DS XL玩得過癮

任天堂行貨機一向出得慢，等一兩年先見街都唔出奇，不過今次出Nintendo 3DS XL就唔同晒，在日版推出兩個月後就有行版！Nintendo 3DS XL比3DS上下屏幕各大了90%，睇3D畫面更舒服，冇咁易頭暈！遊戲機介面轉晒做正體中文之外，當然亦有中文版3DS遊戲同步推出。

行貨主機配新色

今次推出的Nintendo 3DS XL跟3DS，其實早有日版和美版，功能同規格方面不用多花筆墨，不過今次香港任天堂就引入了新主機顏色，Nintendo 3DS XL有白色和藍襯黑兩種配搭；Nintendo 3DS則有晴空藍及珠光桃紅兩款，算做有誠意，而且主機價錢亦低開，應該吸引到唔少家庭客源。惟要留意行版機只能玩到行版3DS遊戲，因此任天堂會推出《瑪利歐賽車7》同《Biohazard Revelations》兩款中文版3DS遊戲，咁就唔怕有機冇Game玩。

自家大作護航

其實這兩款遊戲一年前已有日版推出，不過日文介面未必個個玩家識睇。《瑪利歐賽車7》的問題冇咁大，因為主要操控方法大家都識，唔識日文都知點樣玩，反而標榜回歸原點設計的《Biohazard Revelations》，就涉及唔少劇情同埋解謎部分，冇中文輔助的話，真係未必玩得掂。日前香港任天堂更搞了一次傳媒試玩會，除有得試這兩款首輪推出的中文化遊戲之外，仲有得試埋10月底推出的《薩爾達傳說─時之笛3D》，以及未知幾時會正式上市的《超級瑪利歐3D樂園》同埋《任天狗狗＋貓貓》中文版。

中文遊戲有得試

《薩爾達傳說─時之笛3D》講得到諸神遺產而令世界陷入混亂的大魔王要同勇者林克穿越時空決戰。發布會現場試玩版只收錄第一版Tutorial模式，畀玩家學習操控，小記可從畫面上的中文顯示得知所有操控按鈕及操控方法，完全唔怕盲摸摸。另外《超級瑪利歐3D樂園》同《任天狗狗＋貓貓》這兩套未定推出日期的遊戲亦有得試，前者透過Nintendo 3DS XL的大屏幕開盡3D玩，認真夠立體，一唔小心仲好易跌死；至於《任天狗狗＋貓貓》就分成玩具貴婦犬、柴犬、法國鬥牛犬三大類別，可以同寵物玩、影相，以及拖佢出街散步識新朋友，仲識得用中文溝通添！

SPEC

Nintendo 3DS XL（行貨）

屏幕尺寸：4.88吋（上屏幕）、4.18吋（下屏幕）

機身顏色：白、藍×黑

體積：93×156×22mm

重量：336g

推出日期：9月28日

售價：$1,749

Nintendo 3DS（行貨）

屏幕尺寸：3.53吋（上屏幕）、3.02吋（下屏幕）

機身顏色：晴空藍、珠光桃紅

體積：74×134×21mm

重量：235g

推出日期：9月28日

售價：$1,499