喜氣洋洋……熱烈地謝票

9月9日的選舉，一切結果早就塵埃落定，重點是你有去投票嗎？能夠隨自己心意投出心水的一票，是自由社會的可貴，大家不要輕言放棄個人擁有的公民權利。投開有條路，由本報Sunlife主辦的「夏日SNAP SHOT大募集」已經募集完畢，兩組比賽分別10強已經誕生，現在正值B組「笑了……」的投票階段，各位不妨由即日至9月20日11:59pm，登入http://on.cc/snapshot票選個人的心水作品。

除了上述兩件投票事件外，小女「大嬸」早前到影樓拍攝了一輯公主造型照，美不美真是見仁見智，但影樓職員提議將大嬸的相片放上FB讓公眾投票，競逐月份之星，結果經過一眾Aunt、Uncle、哥哥、姐姐的傾力一投下，大嬸竟然登上月份之星寶座，成為該月的票后之一，在此本人謹代表大嬸高歌近日金曲《喜氣洋洋》，熱烈地謝票，「些些」！

Denise Edition

萬聖節又嚟喇！

做副刊，會比其他人早「過時過節」，何解？因為我哋一般喺節慶舉行前幾個星期，就需要開始準備相關嘅採訪，所以早前我哋已經過完中秋節喇！所謂「光陰似箭」，有日途經旺角窩打老道嘅環球UML HOBBY館，嗰度不但過完中秋，仲已經過緊萬聖節添，事關佢哋依家正接受萬聖節米奇公仔預訂，每個$198。米奇拎住啲例牌嘅萬聖節嚇人工具，如魔鬼椏杈、掃把、骷髏頭、南瓜頭等，見佢一臉傻氣，不禁要講句：呢個萬聖節好鬼Cutie喎！

WL Reporter

60蚊抵玩運動日

見到運動員攞金牌，未至於會感動到流淚，不過心底裏也受到體育盛事所影響，燃起了小記與一班朋友的運動之火！早前某個星期日，「倒塔」咁早起身，山長水遠走到西貢的保良局北潭涌度假營，來個金牌鬥一番！一行16人浩浩蕩蕩，玩了多個項目，包括：游泳、羽毛球、乒乓球、攀石、彈床、康樂棋、美式桌球等，還有我最喜愛的射箭，可惜當日繩網及水上單車暫停……玩足一日包埋個午餐，都只花費了$60左右，抵玩！當作一個有益身心的聯誼活動，好過個個星期花幾百蚊淨係去劈酒啦！期待下次再玩！^^

Sammie Reporter

至抵Tea選

上個星期五，工作忙碌，既要借貨，又要做訪問，所以只能以Tea代Lunch，為了好好補償五臟廟，我特別到一間至愛的雪糕店歎一個Tea Set。呢個Set包一個雪糕球、一件蛋糕、一杯飲料，計埋加一，都只不過係$60.5，堪稱全店至抵之選，不過優惠只限星期一至五，下午2時至6時，若然公眾假期都有，我肯定成日去食啫！

Lum Reporter