陶瓷雪條棍

台北市行到悶？從台北車站搭乘半小時火車到鶯歌來個小旅行，看看當地聞名的陶瓷也不錯。年前到過歐洲陶瓷發源地德國邁森（Meissen）小遊，那兒的高級陶瓷製品貴到得人驚，鶯歌製品就明顯親民得多，有時間還可以去陶瓷老街或小型工作室見識。即使時間不夠，都一定要去陶瓷博物館看陶藝雙年展展覽，但留意展期只到11月4日。紀念品店內的瓷杯瓷碟其實不貴，如帶回香港恐會撞爛，惟有食支雪條當留念補數。何解？因為紀念品商店有售賣陶瓷花花雪條棍的台灣生果口味特別版雪條「春一枝」，當紀念品最好不過，只售約12蚊港紙，抵。我貪鮮艷買了支紅色洛神花味，但味酸，難吃，怕中伏的還是揀鳳梨吧！

Brian Reporter

過癮「籃」人書

小記係標準籃球迷，對NBA嘅消息同趣聞都聽過唔少，不過呢本同事籠底搵出嚟嘅《達摩籃球秘笈》就真係聞所未聞！原來呢本1995年出版嘅台灣讀物，曾經係唔少七、八十後籃球迷嘅恩物，全書200幾頁都以漫畫加文字分析當時NBA球星嘅招牌動作，作者仲為每一招改埋啲好搞鬼嘅名堂，好似奧拉祖雲（Hakeem Olajuwon）嘅「回眸一笑」、米高佐敦（Michael Jordan）嘅「撥草尋蛇」，畫風、對白都超搞笑，更教咗唔少技術嘅要訣，各位未睇過嘅球迷不妨搵嚟煲煲！

Vincent Reporter

又電又Router

小記做得呢行難免要出遠門工作，後備電同旅行Router都係必備，一個可以令你保持通話，一個就可以確保你保持連線，不過咁多立雜嘢，一係唔記得帶齊，一係就鬼咁重。有日發現呢舊後備電原來已經兼具旅行Router功能，最頂癮係夠電嘅話，連牛都唔使駁，出門從此輕便咗！

Michael Reporter

老戲骨戲味濃

星期六，無節目，走入影碟舖，買了這套BD版《諜網謎蹤》。不為其他，只是因為由加利奧民（Gary Oldman）主演。筆者自《這個殺手不太冷》就喜歡他，特別喜歡他那充滿邪氣的眼神，所以睇最新蝙蝠俠系列總覺不是味兒，角色太正氣，與他的邪氣格格不入。講番套《諜網謎蹤》，如果你見到間諜兩個字，就以為是另一套職業特攻隊或007的話，就肯定失望而回。查實此乃講述美蘇冷戰時期的間諜片，雖然動作場面欠奉，但卻拍出老戲骨戲味，加利奧民偵查時發現敵友關係千絲萬縷，亦很緊湊。不過，如果打算星期六關上大腦，此片就未必適合了。

Angus Reporter

貼紙多玩法

有時買嘢唔係貴就好，即使價錢低廉，只要發揮創意都一樣過癮。好似前排喺商場買嘅Simpsons貼紙，表面只係Simpsons脫下褲子打出屁股，無咩意思，但只要放在燈掣上，就知道是洗手間燈掣；又例如一張「東」字貼紙，字面解泛指方向，但一經貼在MacBook，遮咗佢個Logo，陌生人即時知道小記任職哪間傳媒機構，簡單直接！

Gilbert Reporter