入樽冇腳軟EB 1/6 Kobe Bryant
傳聞已久嘅「超人」轉會，早前終於塵埃落定，Dwight Howard落實加盟LA Lakers，加上助攻王Steve Nash及Pau Gasol留效，嚟緊湖人勁到爆！不過無論何方神聖出現，一哥始終都係Kobe Bryant，呢位曾經單場攻入83分、攞過五次總冠軍及兩面奧運金牌嘅當家球星，出道至今嘅副產品多如天上繁星，最近Enterbay就攞正License出1/6 Figure，本地著名NBA收藏家Thomas Leung試玩過就話︰「我最欣賞Body靈活夠硬淨，擺甫士近乎完美！」
開設NBA新Line
EB近年大展拳腳，繼之前嘅1/4系列後，最近仲攞到NBA官方授權，推出「籃球巨星Real Masterpiece」系列，現役球星任佢出，考慮過人氣及成就後，KB可謂頭炮嘅不二之選。頭雕由韓籍大師Scuderia操刀、YJ上色及監修，隨盒有自信笑容及上籃O嘴兩款任換，Thomas過目之後表示︰「整體輪廓都OK，某啲角度睇落都幾似，雙眼大小、鼻樑同膚色都跟到足，稍嫌係頭太細、頸唔夠粗，同Body有啲唔夾。」
波衫紋身統統跟足
1/6 KB嘅Body屬於全新開發，比一般嘅1/6 Figure高成吋之餘，關節仲追加至40個之多，加上鉸位夠實淨，擺控球、上籃及鋤樽甫士都靈活冇腳軟。至於手臂嘅紋身，以及右臂同右腳分別套上紫色護肘及護膝，配合Spalding磁石波，成個Look都跟到足，Thomas補充話：「件紫黃色作客球衣都做得唔錯，褲頭緊兼Size Fit，但係波衫太大件，又冇主場或All Star球衣換，仲有改善空間。」隨盒仲有一對Kobe嘅主、客場專用波鞋，粉絲一睇必定認出係邊款Model，美中不足係授權問題，唔可以出埋商標，未能畫公仔畫出腸，期望日後出「波神」Michael Jordan時會解決得到啦！
＊最終產品與相片顯示或會略有不同。
查詢︰2332 3615（Enterbay）
EB 1/6 Kobe Bryant 零售價︰$1,380
球迷有Say
Thomas︰「作為首款1/6 NBA Figure，呢隻Kobe Bryant絕對比McFarlane嘅公仔靚好多，期望將來可以出埋Magic Johnson及Larry Bird等經典球星啦！」
紫黃色作客球衣似乎大件咗啲，還幸Bryant及24號字樣清晰顯眼。
五官拿捏準確，Thomas仲話笑容Look比O嘴Look更神似。
雖然兩對專用Signature Shoes嘅顏色跟到足，但冇咗招牌商標，美中不足。
隨盒備有五對造型手掌，其中兩隻內藏磁石，可以將磁石波揸到實一實。
右臂印咗皇冠及太座名字嘅紋身，而且做到清晰冇模糊。
為咗唔好妨礙手臂活動，胸部嘅包膠刻意包唔晒、凸出少少Ball-joint位，都算情有可原啦。
膝頭設有雙關節增加可動性，不過穿崩位實在太顯眼，如果送多塊護膝遮一遮會好好多。
既然隨盒有冠軍獎盃，點解會冇冠軍指環呢？實在可惜。
連包裝盒都用埋代表湖人嘅紫黃雙色，盒面印埋Kobe簽名式樣。