祖國廁文化

返大陸玩，最怕上廁所，雖則日子有功，早已練成好踎功，上踎廁不再有難度，但廁所的衞生情況超惡劣，確係難搞，像此行到西藏便中晒招。當地大部分是收費廁所，有的收一蚊人仔，有的收兩蚊人仔，收錢都唔緊要，最慘不少都是旱廁，廁所冇燈又冇水沖，腳下的情況比蛀出蟲的爛蘋果還要糟，相信大家可以想像到廁內有幾臭、衞生情況有幾差，不用我以筆墨詳加描寫。如果可以，我情願學男士們一樣，$0享受排排企唱山歌的野趣，應來得更舒暢。

Konnie Reporter

新加坡 3D凹雕

近年3D電視、遊戲及電影熱賣，無非畫面虛擬夠「凸」出，令立體感十足。但原來要3D感覺唔一定要向前凸，「凹」一樣可以做出類似效果，好似新加坡小印度區一間舖頭，賣的全是凹雕，卻出奇地有玲瓏浮凸的效果，雕像無論在哪個角度欣賞，雙眼都好似望着你咁！

Boris Reporter

戴面罩 變靚仔超人

編輯E早前去首爾旅行，回來時為旅遊組同事送上手信，滿以為是紫菜或柚子蜜沖劑等行貨，怎知是Mask一塊。面膜除了有去黑眼圈、黑斑和美白成分等例牌功能外，最重要是以蜘蛛俠及蝙蝠俠的面罩包裝，蜘蛛俠那款採用了粉紅色格仔設計，感覺相當「流」；反而蝙蝠俠那款落足料，黑色面膜加上了招牌的尖耳，讓人有敷Mask變超人的感覺。除了設計頂癮，包裝紙上更附加一句：「Handsome Batman Mask」，難道真是敷完更有型？

Chiu Reporter

貓咪瑜伽

東南亞多國中，小妹對泰國情有獨鍾，因為當地唔單止人Nice，連貓都特別Nice！話說上次去清邁，在景點門前見到隻街貓，作為貓癡的我當然唔會放過，難得佢身為街貓都唔怕人，同佢玩完一輪又肯企定定任影，仲擺出各款高難度甫士，連圖中的瑜伽動作都出埋，你話抵唔抵讚先？

Ying Reporter