狼．圖騰HT 1/6 Wolverine

今年影壇畀Super Hero搶盡風頭，復仇者（The Avengers）固然係當頭大熱，其實同屬Marvel陣營嘅《X-Men》，早就喺大銀幕係威係勢，當中第一主角狼人（Wolverine）更係Marvel人氣王，唔只喺多次英雄選舉中排第一，仲砌低其他角色率先拍外傳。Hot Toys三年前就出過外傳版嘅狼人Figure，今年再接再厲用正傳做藍本，以新頭雕、新Body炮製呢款再版狼人，完美程度足以成為一眾粉絲心中嘅狼圖騰。

愈慶愈有型

其實新版狼人喺今年動漫節已經露過面，造型係以《變種特攻》三部曲最後一集《兩極爭霸》為藍本，分別由Im Jung Hyuk雕頭、JC.Hong上色，仲罕有咁採用憤怒Look做表情，青筋、咧嘴清晰可見，加埋原著嘅怒髮衝冠Look，比起舊狼人有殺氣得多！HT更表示上次Hugh Jackman多番審批先滿意頭雕，但係今次一剔Pass，證明佢本人都好Buy呢個「憤怒了」新頭雕。

大隻佬Body改良版

上次HT特別為狼人開發新Body，自此呢款素體成為好多大隻佬角色嘅優先選擇，今次新版繼續沿用，仲喺胸口及大髀加入海綿，令肌肉感更加明顯。服裝方面，同上次牛記笠記嘅「華D」Look好唔同，今次跟番電影着黃間黑底戰鬥服，表面壓有暗紋，仲經過高周波處理，更具立體感之餘，亦唔怕關節外露咁尷尬。由於狼人打拳腳交居多，所以武器只有一對合金製嘅鋼爪，好彩HT都送番個機械人地台補相，擺設或影相都連戲得多。

查詢︰2388 4677（Toy Hunters）

＊圖中為試辦款式，與正式推出的版本或有若干分別。