賀10周年Xbox搞迷你E3

原來Xbox登陸香港同亞洲區已有10年（第一代Xbox主機於01年底在美國推出，亞洲區02年才推出），因此Microsoft就在亞太地區大搞猶如「迷你E3」的產品巡禮，日前在港舉行的活動更是亞太區首站。雖然實際陣容不及E3或全球預覽會，不過Microsoft都請來好多遊戲製作人介紹年底前推出的新遊戲，認真大堆頭！其中焦點所在肯定係《COD: Black Ops II》！

七款遊戲製作人撐場

今次亞太區產品巡禮一開波就係台上活動，然後分組進行製作人訪問或試玩新作。今次有七隻遊戲嘅製作人嚟咗香港，分別係《Forza Horizon》、《Dance Central 3》、《Fable: The Journey》、《Call of Duty: Black Ops II》、《Nike+ Kinect Training》、《Dead or Alive 5》、《Tekken Tag Tournament 2》，仲有Xbox LIVE要員介紹SmartGlass，真係畀足面香港Game迷。

至於台下試玩區就有多隻新Game可供試玩，好似自家射擊大作《Halo 4》、Capcom遊戲《生化危機6》、EA足球遊戲《FIFA 13》以及走家庭路線的體感遊戲《Kinect Nat Geo TV》等。理論上《Halo 4》名氣最大，不過即場有得玩嘅《Halo 4》試玩版都只係行行企企，畀大家預覽吓戰場環境為主；而且由於時間太短，遊戲太多，基本上沒有太多人有時間試玩！

《COD: Black Ops II》血戰2025洛杉磯

試玩台無得玩《Call of Duty: Black Ops II》，就算上到去同製作人訪問，都係只得製作人自己試玩同播片，但講遊戲的臨場感同刺激感，已勝過其他同場遊戲。今集將故事背景推到2025年嘅未來世界，講強國因稀土而引發新一輪衝突，大量新型武器同載具都會在遊戲中登場。遊戲製作人今次分三部分示範新一集遊戲，第一段係喺洛杉磯高速公路保護要員時捲入戰鬥，其實呢一段喺E3遊戲展時都有展示過，不過今次製作人就試埋坐上裝甲車趕去城市戰區打巷戰，以及入商場打近身戰，真實感同現場感都一流。

Strike Force控制整支小隊

而第二段就係今集新加入的Strike Force玩法，仲將戰場由美國拉到新加坡港口，不過場景又唔覺太有新加坡特色。至於玩法就好特別，Strike Force唔再係控制一個隊員，而係控制成支小隊，每攻下一個Secure Point後就可切換所扮演的士兵，一個版圖有多種玩法。製作人話暫定遊戲會收錄六個Strike Force任務，最後喺新加坡打到尾會啟動埋導彈射爆貨船，誇得嚟又好正！至於第三部分就係播片展示Online戰時嘅玩法，可以俯瞰成個戰場，仲可以用右手邊個List揀唔同隊員作戰，大作不愧係大作！

Nat Geo、芝麻街體感上身

其實今次試玩區都有兩隻闔家歡嘅Kinect遊戲，包括有專為芝麻街Fans而設的《Kinect Sesame Street TV》同大賣可愛風格的《Kinect Nat Geo TV》，其中後者有得試玩。《Kinect Nat Geo TV》都係玩簡單體感動作遊戲，好似要抹走畫面上遮住自己嘅泡泡，但有趣在於Kinect會自動幫大家為畫面的影像加上動物頭同動物手腳，造型搞笑。

至於另一款以運動鍛煉為主的《Nike+ Kinect Training》暫時可以公開嘅資料唔多，同E3時宣布嘅資料接近，係可以同世界頂尖運動員在體能上比併。值得一提係Xbox會由九月中開始舉行名為「XFriends」的Xbox LIVE比賽，精選八款遊戲搞線上比賽，一直玩到11月中，八個單項排名第一嘅高手仲可以參加總決賽，有機會捧走一萬蚊美金同24K鍍金Xbox 360主機，想參加嘅機迷就遲啲要留意詳情喇！

新Game巡禮：《Call of Duty: Black Ops II》

推出日期：11月13日 售價待定

《Halo 4》

推出日期：11月6日 售價待定

《Forza Horizon》

推出日期：10月23日 $329

《Kinect Nat Geo TV》

推出日期：9月18日 $199

《Fable: The Journey》

推出日期：10月9日 $259

《Dance Central 3》

推出日期：10月16日 $259

《Tekken Tag Tournament 2》

推出日期：9月11日 售價待定