模型迷之王道MGF《Tiger & Bunny》
今年影壇，英雄玩晒！荷里活嘅Super Hero早前橫掃全球票房，今個月輪到東瀛派接力發威，日本、台灣、韓國、新加坡及香港將於22日同步上映《Tiger & Bunny》劇場版首部曲：The Beginning，Bandai亦搶先推出兩大主角嘅MG FigureRise（簡稱MGF）模型版本，名副其實畀機會大家—人人「造」英雄。
其實「虎與兔」嘅商品化行動，早於去年開始，由純擺設嘅Figuarts Zero雕像，到可動Figure SHF，甚至將於今年年尾上架嘅12"PM 1/6 Figure，統統都係完成品，對Die Hard派嘅模型人嚟講，始終唔係嗰杯茶；逐件組件慢慢砌嘅MGF，先至係模型人嘅王道之選嘛！
金銀位上色除膠味
與MGF之前推出嘅拉打相比，Tiger及Bunny更顯精細，除咗跟足原著嘅人設細節外，最大突破係組合上分為素體與外甲兩層，令整體造型更富層次感。今次製作以素組為主，正如同廠嘅MG高達模型般，大部分組件都係分色處理，不過原來嘅銀色部分，MGF只係「膠味濃」嘅灰色組件，故此建議大家另行塗裝，同樣問題亦出現於Bunny背部一對「兔仔耳」嘅金色內構部分；其實只要噴上底灰，再噴金或銀色，加埋黑色嘅素體用消光處理，就可盡除「膠味」，成隻英晒！
英雄都係打工仔
《Tiger & Bunny》嘅一大Gimmick，就係各路英雄其實都係打工仔，要靠亮麗「業績」爭取贊助商支持，故此身上貼有贊助商商標，有啲係虛構、有啲係現實存在嘅品牌，作用同波衫心口有贊助商商標一樣，令觀眾分外有投入感。MGF版本就一一跟足，好似Wild Tiger虎徹嘅心口及肩甲，就有S.H.Figuarts及SoftBank嘅貼紙；Bunny巴納比嘅心口就貼上Bandai、前臂嘅透明甲就有amazon.co.jp，做到維妙維肖。
霹靂拳VS天殘腳
做得英雄，當然要有必殺技，《Tiger & Bunny》嘅英雄都有各自嘅「Good Luck Mode」強化武裝，MGF亦都做到精密重現，Wild Tiger嘅右手就可換裝巨型拳頭，腕甲亦內藏Wild Shoot；Bunny嘅右小腿亦可換上大型組件，出招時似足天殘腿。最窩心係隨盒附有專屬台座，可以扣實模型背後擺甫士之餘，亦可安裝喺強化武裝底部，用嚟托拳頭、托大腳，都唔怕因組件太重而失平衡。
查詢：2433 1828（瑞華行）
MG FigureRise Wild Tiger建議零售價：$379
玩家可以換件形式重現人面Look，面相貼紙備有普通和水貼兩款，由於面形輪廓嘅起伏比裝甲為多，普通貼紙又黏力不足，故此就算使用起嚟較麻煩，還是推薦用水貼。
整體組件已經係分色處理，加埋滲線嘅話就更見精細。
換裝Wild Shoot發射組件，就可擺出有型嘅雙槍甫士。
Wild Tiger嘅招牌「Gel頭」甫士，以至Bunny嘅飛腿動作，MGF都可傳神做到。
動畫人設中最出位嘅贊助商元素，MGF一一落齊。
Bunny背部「兔仔耳」嘅金色內構部分，以及Wild Tiger嘅銀色組件，最好另行塗裝增加質感。
連腳底都有細緻線位及透明件，抵讚！
Wild Tiger及Bunny隨盒各有一個多用途專用台座，毋須另購。
MG FigureRise Bunny Brooks Jr.
建議零售價：$379
