娜姐Ada Mode弩射喪屍

啱啱好仲有一個月時間，《生化危機6》呢隻重型遊戲大作就會賣街，今集七位主角將會兵分幾路打喪屍，仲打到嚟香港添！大作當然要發大嚟搞，早幾日Capcom除專誠請來日本遊戲製作人小林裕幸介紹遊戲同回答傳媒提問之外，仲請嚟周秀娜Cosplay索爆女角Ada Wong兼即席試打之前Download試玩版都冇得玩嘅「Ada Mode」，拎起支弩射低喪屍，揭開生化陰謀！

用死屍打開機關

《生化危機6》主角有七位，包括Leon、Chris、Jake、Helena、Sherry、Piers，當然亦有娜姐上身嘅Ada，並會以四條遊戲主線發展。好似Leon Story會有Leon同Helena，Jake Story會由Jake搭Sherry，Chris Story就會由Chris同Piers行孖咇，Ada Story就淨係得Ada單打獨鬥。至於早前有得下載嘅試玩版中，咩故事模式都有，唯獨欠Ada Mode。始終《生化危機》唔係只打喪屍，仲好考玩家嘅腦筋，正如娜姐台上試玩嘅一段Ada Story就喺墓地入面，要利用吊在天花板嘅死屍幫助打開機關以獲取拼圖，再進入秘道。娜姐一面要對住鏡頭，一面玩都好有難度，好在得日本Capcom工作人員上前幫手，先至順利得到兩塊拼圖。

化身喪屍咬主角

今集Ada換上新衫，由以往嘅高衩旗袍換成紅色Deep V上衣配緊身黑色皮褲，仲改用弩作武器，講造型娜姐嘅Cosplay扮相真係有過之而無不及。支弩型就型，不過Loading時間都幾耐，遠距離攻擊唔錯，近身時都係用手槍效率高啲。至於遊戲玩法同以往冇太大分別，但改進咗可邊行邊打，解謎成分亦好有挑戰性，最搞鬼係加入特別「Agent Hunt」，即係每打完一版之後就可以Unlock該版的「Agent Hunt」，唔扮型男索女主角，調轉頭扮喪屍反咬人類，雖然發布會上冇得試玩，但聽落真係好吸引。至於四條遊戲主線仲會安排咗幾個Crossover位，即係角色可以喺特定場口遇上，仲可觸發成多至4P嘅Co-op Mode，設計得真係幾有心思。

出現疑似香港場景

四條遊戲主線都要幾花時間慢慢煲，相比以往《生化危機》系列更耐玩，連製作人都話大概要花30小時先打得爆！今集另一賣點係有「香港」版圖，即係可以喺香港打喪屍同巨型變種生物。但發布會上，製作人就話今次係參考過好幾個中國城市的場景而製作出城市版圖，無特定指明係邊個城市，不過場景入面有大家好熟悉嘅巨型霓虹招牌，同埋背景會有人講「你死梗喇！」等廣東話，唔係香港仲會係邊度先？香港玩家一向都鍾情血腥重口味，所以Capcom都一如慣例將美版《Resident Evil 6》製作成行版，並用上美版及日版《Biohazard 6》雙封面設計，滿足晒兩派玩家要求。今次預訂遊戲都有着數，有機會得到極限量版風褸，另首批遊戲更會送三個場景添！

INFO

類型：動作

開發：Capcom

平台：Xbox 360、PS3

售價：$368

推出日期：10月4日

查詢：2366 1001