電暈你HT 1/6 Catwoman

與英雄遲暮嘅蝙蝠俠相比，風姿綽約嘅貓女郎安妮希芙威（Anne Hathaway），喺《蝙蝠俠—夜神起義》（The Dark Knight Rises）之中的確搶盡風頭，窄身戰鬥服加烈艷紅唇，仲要坐埋Batpod出場型到痹，難怪唔少戲迷都封佢做女神。雖然筆者唔係蝙蝠俠，一樣可以將女神帶返屋企……我講緊HT嘅1/6 Catwoman呀！個樣似到冇人有，仲用咗新Body還原真人嘅高挑身材，難怪呢幾日門市都有訂貨人龍啦！

真人特徵傳神展現

朗尼植髮後有番球運，Catwoman亦靠呢招省靚個樣，後者嘅All Back頭不但柔順到負離子咁款，定型亦比頭髮又短又鬈嘅Black Widow容易，玩家唔拍難打理。面相更加索到爆，由K.A.Kim負責雕功、J.C.Hong上色，瓜子口面、雪白肌膚加烈艷紅唇，十足真人上身；HT指阿Anne眼大口又大，由於特徵夠突出，相對其他真人頭雕，更易捉到神髓，而且當事人毫冇明星架子，所以好快就完成審批。為求盡善盡美，HT表示仲會為頭雕進行微調，包括正式上架時，眼罩可以除落嚟，現階段只有眼罩Look示人，保持神秘感。

緊身衣盡騷長腿美

HT逢出女角，基本上都會重塑一個新Body，今次都唔例外，素體雖然由Black Widow改造而成，但按照阿Anne嘅真人身形，縮胸、收腰兼駁長美腿，去盡贅肉，令緊身衣之下嘅誘人線條Show晒出嚟。另一方面，為應付大動作Pose，戰鬥服採用薄身兼高彈性嘅複合拉架物料製作，用埋滴膠技術還原凹凸花紋，細緻之餘柔韌性極高，就算騎上Batpod都唔會硬晒軚有欠自然。配件方面，Catwoman花拳繡腿居多，所以只跟一把曲尺手槍及七款造型手掌，坦白講少得可憐，好彩跟盒仲有一款新設計嘅水滴地台，總算新意搭夠。

＊圖中為試辦款式，與正式推出的版本或有若干分別。

查詢︰2388 4677（Toy Hunters）