紙管機械人

每次去大型書局，最喜歡睇DIY產品，有晚在奧海城商務，畀我發現呢個來自日本嘅DIY手作仔。上網搵到其網站，原來呢個牌子叫Piperoid，每包有好多條又長、又幼、又花哩花碌嘅紙管，紙管上有幾個窿，只要把紙管剪成指定長度，然後插入適當嘅窿裏面，就砌成相當可愛嘅公仔，造型主要是機械人。話晒呢啲嘢Sell創意，價錢唔平，每包成百幾蚊，但只是砌到一件作品，不過鍾意DIY嘅人，應該覺得物有所值。

網址：piperoid.jp

WL Reporter

專人帶你遊極地

其實去海洋公園睇動物都幾睇彩數，萬一牠要睡午覺，你也沒牠辦法。小記就剛剛與一班小朋友參加了一個由海洋公園學院開辦的冰極天地教育課程優先體驗班，除了互動有趣的教學知識外，還有訓練員領着海象給你慢慢睇，比坐在課室「齋睇相」深刻得多。這張相片是有點黑，但不是小記偷懶不用閃光燈，而是怕閃燈會嚇親動物，請大家見諒！

David L Reporter

溝淡論

由於有幾個姨甥仔、姪仔，所以我剛出生的囝囝有許多二手衫褲，慳了不少衫錢。早幾日卻忽然豪氣地買了千幾蚊衫褲給他，後來與同事說起此事，她向我推介了一間網上商店，還說價錢超抵，當晚回家即時心癢癢上網，竟然見到我花了300蚊購買的褲子，在此網店竟只售65蚊！當下心情大跌，最後我抱着「溝淡」的心態，決定在網店買多條同款不同色，以平復我買貴了的這個事實。

Lum Reporter

新舊永利街

早前要找溫馨懷舊外景拍攝場地，走到久違了的上環永利街。自從《歲月神偷》上映，政府大事張揚保育永利街後，我都未正式目擊最新情況，一直都是道聽途說，這次讓我明顯看到分別。先看到保留原狀的永利街10號，呈現殘破古舊，但要住人則有點兒勉強；經過保育後的9號，可以住人，但多了人工化設計，失卻味道。這次難得地新舊並列，看到的是：「舊就舊到底，新就新到盡。」有時會想，保育要找平衡點，真有這麼困難嗎？

Rachel L Reporter