雲上旅程：警察先生的尾巴（三）

當警員B還在一旁打電話時，另一位頗寸、也是姓陳的警員C走到我面前，問：「陳生，有甚麼可以幫到你？」可能他們以為通道開了後我會走吧！可惜，我好想知道姚Sir是如何為事情作決策的，便說：「嗰邊位陳Sir幫我叫緊姚Sir嚟，唔使咁多人招呼我，呢位阿Sir不如去做自己嘢啦！」

警員C可能畀我寸親，便說：「我比佢高級！你可以叫我幫你，我覺得無論高級或低級警員，都可以幫到你囉！」聽後我咭一聲笑了出來，不是因為他稱同事低級，而是他的邏輯。於是我笑笑口回警員C：「既然你話無論高級或低級警員都可以幫到我，（我指一指）嗰位低級警員已經幫緊我搵姚Sir，作為高級警員的你，咪可以做其他嘢囉！」警員C聽後呆了好幾秒。其實警員C真係幾可愛o架，一般情況下，梗係下級不想煩到上級才說類似的話，你話如果CY說：「上級下級一樣，我幫你，唔使搵林鄭！」就好啦！

這時，「低級」的警員B回來了，表示姚Sir因為太忙不會來！好呀！我說：「咁姚Sir警員編號係幾多？你話二揀一o架！」警員B呆了呆說：「姚Sir係無警員編號嘅！」我說：「乜話？姚Sir係無警員編號？咁都講得出！」他再說：「我無咁講，我係話晤知啫！」我再說：「剛才你大大聲對現場所有人講姚Sir係無警員編號，依家又唔認？」此時，一位路過的姚Sir下屬，見狀便馬上把姚Sir的警員編號告訴了我。（明天續）