《Darksiders II》死神出山

唔少外國玩家都吼實由Vigil Games開發、THQ發行嘅《Darksiders II》，話佢係今年Q3最有睇頭嘅遊戲。此作的第一集於2010年初推出，靠史詩式劇情加上人物設定造得吸引而跑出；新一集自然大幅加碼，地圖比上集大四倍，主線任務都最少要玩30個鐘，認真抵玩！今集由新主角Death（死亡）取代上集主角War（戰爭）領軍，乘住座騎「絕望」出場，霸氣至極！睇嚟遊戲系列會長出長有，另外兩位天啟騎士都怕且可以喺稍後兩集擔正！

死神擔正 為兄弟爭口氣

《Darksiders》系列圍繞四位天啟騎士開展，只要集齊War（戰爭）、Death（死亡）、Fury（憤怒）同Strife（紛爭）四位嘅力量，天堂地獄就畀佢哋玩晒。本來佢哋四個都畀第七封印封住，第一集講其中一位騎士War（戰爭）被解除封印，要佢打邪惡魔王，結果觸怒天堂、地獄同The Charred Council（焦灼議會），畀三方追殺。今集就輪到War嘅兄弟Death（死亡）出關拯救War，為佢爭番一口氣。只見Death一身死神裝束上場，而且霸氣到一出場就可以騎住座騎Despair（絕望），在空曠地方仲可幫手出招，比起上集War打到大半路先有座騎Ruin（毀滅）幫手，未打已經先贏氣勢！

烏鴉帶路唔怕迷失

唔止Despair幫到手，今集Death更可以召喚來歷不明的烏鴉Dust出來幫手，咁細隻烏鴉當然唔係用嚟打交，而係由佢帶路。今集開發小組就話明大幅加大地圖，比上集大成四倍，仲有好多地下城，無幫手都幾難搵啱路，所以玩家可以召喚呢隻烏鴉出來指引路向，等大家唔使走咁多冤枉路。遊戲亦延續到上集嘅特點，就係要用腦先至可以解開謎題去到指定區域，呢方面亦係《Darksiders》系列其中一大殺着。由於地圖大，加上故事本身都偏向黑暗，如果只用黑暗色調設計場景同角色就好易玩到瞓着，所以《Darksiders Ⅱ》用上比較鮮艷的美式漫畫風格色彩，感覺就生動得多。

自製超級武器

至於戰鬥同武器系統都有所強化，經重新設計的「延遲系統」，令主角Death手持的鐮刀能做出更多招式，而且攻擊面夠大，唔使成日埋身肉搏；又新加入附魔武器，可以用特定物品提升武器的經驗值，甚至可以幫武器改名，假若有心機、有時間的話，可打造非常個人化的秘密武器！遊戲仲加入連動功能，如果部遊戲機內有第一集Save檔的話，係可以免費得到件低等級護甲，增強Death的防守力；如果之前打爆過《Darksiders》的話，仲可得到把「等級1」的傳奇鐮刀，大大增強攻擊力同作出致命一擊，就算面對超巨大BOSS都無有怕。自問技術超卓，亦可以挑戰冇Save Point、一死即Game Over嘅「噩夢」模式，睇吓用一條命可唔可以打低晒所有邪惡勢力！

INFO

類型：動作

開發：Vigil Games

平台：Xbox 360、PS3

推出日期：已推出

售價：約$400

查詢：2359 7998