HT電影Figure三連霸
一連五日嘅動漫電玩節已經完結，雖然大會首次加入唔畀即場賣限量版嘅規矩，但係Hot Toys展區依然大排長龍，何解？咪係為咗睇一系列首度曝光嘅電影Figure囉！除咗本報早前介紹嘅1/6 Iron Man MK.Ⅶ，當日仲展出咗同比例嘅Hulk，以及1/4 Batman同T-800；若然動漫節期間未有入場預訂，依家仲可以落門市Order，唔想第日捱炒價，就應趁截訂前速速行動喇！
Batman再起 進軍1/4系列
HT 1/6嘅新Dark Knight好賣到截訂，不過廠商未有將這股黑勢力見好就收，反而破天荒化身為旗下首款1/4作品，高度達至18.5吋，更有分量咁重現蝙蝠俠嘅英氣。呢款大作絕對係集歷代Batman之大成，單係面罩頭雕就有三個，分別提供P.E.R.S.轉眼系統、冷光雙眼及三款可換嘴形，再跟多一款重新雕製嘅男主角Christian Bale頭雕，愁眉深鎖嘅造型，比1/6版本更有英雄滄桑感。
戰鬥服嘅質素亦不遑多讓，胸口、手臂及大腿裝甲全部係獨立部件，配合全身32個關節，變大之餘依然可動性不俗，最重要係立體得嚟又夠Slim，比對手嘅1/4水桶腰蝙蝠俠討好得多。配件方面可謂「賣大包」，除咗有第二集嘅滑翔背包、繩索發射槍、蝙蝠鏢、煙霧彈及Bomb Gun外，連第三集嘅EMP電磁槍都按比例還原出嚟，地台亦係重新製作，以第二集片尾與小丑打鬥嘅地盤為藍本，再附送稻草人、小丑及Bane三代大奸角嘅面具，為日後推出嘅1/4系列提供另類補品。
包膠俠醫 出拳冇穿崩
HT為咗今屆動漫節Set咗個巨型《The Avengers》場景，當中大家最關心嘅，當然係首度展出嘅16.5吋高1/6 Hulk。就試辦所見，質素方面冇令大家失望，頭雕及身軀都由擅雕血獸嘅本地造型大師Joseph Tsang操刀，表達到角色嘅憤怒表情之餘，賁起嘅胸肌及腹肌更係充滿力量感，加埋JC.Hong嘅頂級塗裝，成身青BB都未見偏色，抵讚！另一要Like之處，係雙臂採用包膠設計，手肘位關節唔會穿崩，減少突兀感，但係換嚟可動性下降，不過以Hulk嘅Case嚟講，造型先決實屬明智之舉，反正Hulk一向獨沽一味蠻力上陣，你幾時見過佢好靈活咁耍詠春，或者出玉女劍法吖？
煞食露骨 T-800同步變大
眼見對手Enterbay嘅首款1/4 Project係《Terminator 2》T-800，HT一於死跟，但唔係阿諾舒華辛力加，而係最原始嘅機械骨架版本，唔會輸咗頭啖湯、影響到玩家嘅入貨心態外，仲滿足到一眾Sci-Fi迷嘅狂熱願望。Figure身高達18.5吋，關節亦有30個咁多，舉臂、提腿、轉頭都靈活自如，就連十隻手指都可獨立活動，仲要留意所有「骨骼」都髹咗銀色光油，金屬感滿瀉，不過又好似光鮮得滯，如果正式推出時多番啲舊化，就可以同骸骨地台襯到絕。一如1/6版本，新版1/4嘅眼窩同樣內藏兩盞紅色LED，可惜配件就只有一把膠製步槍，火力削咗啲喎。
查詢︰2388 4677（Toy Hunters）
＊圖中為試辦款式，與正式推出的版本或有若干分別。
QS001《The Dark Knight Rises》1/4 Batman
零售價︰$2,980
預售價︰$2,930
推出日期︰明年第一季
Christian Bale頭雕由Kojun重新雕製，神似之餘，亦比1/6版本更有滄桑味。
面罩Look內置轉眼系統，目光更加電死人。
附件包括三大奸角面具、各式武器、三對造型手掌及一個特製地台。
背脊可以加裝滑翔背包，Bomb Gun拆開後亦可掛喺腰帶上。
隨盒附有雙眼放冷光嘅頭雕，模擬出第二集用聲納掃描敵人一幕。
MMS186《The Avengers》1/6 Hulk
零售價︰$1,980
預售價︰$1,930
推出日期︰明年第一季
手臂採用包膠處理，唔怕肘位關節穿崩。
雖然關節唔算多，但一般動作甫士都擺到。
Hulk用拳頭已經夠揪，所以跟盒只有兩款造型手。
QS002《The Terminator》1/4 Endoskeleton
零售價︰$2,580
預售價︰$2,530
推出日期︰明年第一季
全身關節多達30個，就連手指都識郁。
眼窩藏有紅色LED，漆黑之下開着佢，零舍有Feel。
Boxset只係跟咗一支步槍及一個地台，雖然後者嘅做工令人超讚，不過始終寡咗啲。
