Mountain Lion無慮升級

對於Mac友而言，近期最熱門話題並非隔日又有新料流出的新iPhone，而係剛於上星期正式登場的新OS X Mountain Lion（由今代開始Mac OS X改名為OS X），安坐家中將部Mac機連上App Store，撳幾吓掣就可將部電腦升級到Mountain Lion，而且$158升級費更可話係史上最平！通常好多用家都驚新操作系統推出初期總有唔少Bug，兼容唔到現有軟件，但呢個問題就唔存在喺Mountain Lion之上，真係早升級、早享受！

07年後舊機都可升級

去年7月之後推出用上OS X Lion系統（10.7版本）的Mac機，當然全無問題可升級到OS X Mountain Lion（10.8版本），但舊Mac機又得唔得呢？據官方資料表示，2007年中打後推出的iMac同MacBook Pro、2008年秋季後推出的MacBook及MacBook Air以至2009年開始推出的Mac mini，都有資格升級到Mountain Lion，不過這批舊Mac機都要本身用OS X Snow Leopard（10.6.8版本），先可以上App Store撳掣下載Mountain Lion，好似筆者所用的2009年秋季版MacBook「小白」都可無障礙地升級，就算只得2GB內置記憶體，都算行得順暢。

裝機先Set up iCloud戶口

雖然Mountain Lion升級檔案容量達4.05GB，猶如DVD咁大容量，但筆者測試時，下載大概只需約半小時，另外要花多約半小時執行系統安裝，勝在全程幾乎完全自動波，系統識得幫大家進行所有設定程序。當系統完成安裝後，會提示設定iCloud戶口，因為OS X Mountain Lion其一大亮點是所有系統標準App都支援雲端儲存，例如在Safari內的書籤列可以同步至同一iCloud戶口下的Mac機跟iDevice，在文字編輯內所編寫的文件或備忘錄及提醒事項內的項目，都會同步到其他裝置。如果用家有多過一部Mac機或者iDevice就實在相當方便，完全唔使怕轉用另一部機時錯失重要資料。值得一提是今次升級費，只需$158（US$19.99），相比2009年Snow Leopard升級版的US$29.99（約$230）平得多，而且買一次就可為屋企內多部Mac機同時升級，好似筆者為屋企兩部Mac機同時升級，拉勻每部都只係要畀$79。

iOS功能逆向移植

Mountain Lion比上年推出的Lion其實都有唔少修改的地方，最明顯的改動係引入唔少iOS簡單易用的功能。例如新加入的備忘錄、提醒事項、通知中心、Game Center、AirPlay以至訊息都是由iOS移植的新功能，例如通知中心就是iPhone iOS 5開機時或用兩隻手指從上拉下所拉出的訊息功能，所顯示的訊息可自由設定，如在Mail內收取到郵件或者提醒事項內容都可在通知中心內得知，而通知中心圖示就設在畫面右上角。至於另一好玩的地方是發訊息的iMessage，可以直接在Mac機上跟其他iDevice即時通訊及傳輸相片，工作途中唔需要另外用手機給其他人留訊息。Mountain Lion新改動的，還有所有Apps都支援全屏幕顯示模式，無論係用iPhoto執相睇相、QuickTime睇片，又或者用Safari、Chrome瀏覽網頁都可用以全屏幕模式進行。

Safari對應iCloud兼Sharing

講到Safari，在Mountain Lion裏亦順道升級到6.0版本，最明顯改動是加入Multi Tab設計，終可跟其他瀏覽器睇齊。當然Safari 6.0好處是能支援多種Multi Touch操控，兩根手指輕點觸控板即可放大，兩根手指向左或向右掃即可向前翻頁或向後翻頁；另外亦可配合iCloud使用，書籤列以至瀏覽紀錄都會自動上傳到雲端儲存，無論身處何地都唔怕唔記得之前睇緊的網址。在新Safari工具列上還順應潮流新加入分享Icon，提供加入閱讀列表、新增書籤、郵寄網頁、分享到訊息或者分享到Twitter功能，遲啲更會追加支援Facebook添！