台北直擊Jolin華麗代言韓國熱爆遊戲王《Cyphers》

這幾天颱風蘇拉來勢洶洶吹襲台北，另一股巨大韓風《暴力特區Cyphers》亦在星期二登陸，唔止直吹台灣，亦吹埋香港。這個韓國人氣線上遊戲開創華麗動作結合連技的鬥塔式玩法，在韓國大受歡迎，現在首次推出海外版本，代理Gamania就在台北大搞發布會，兼搵來亞洲天后蔡依林做代言人兼拍電視廣告，睇嚟這股韓風有排吹！

挑戰八萬在線人數

《暴能特區Cyphers》係由韓國Neople所開發的嶄新設計鬥塔（Dota）遊戲，去年得到「2011大韓民國遊戲大賞線上遊戲人氣獎」同「2011大韓民國遊戲大賞最優秀獎」，加上在線玩家人數爆燈，足證這款今個夏天攻台的大作有幾勁。開發商更充滿信心表示，台灣加埋香港市場，有機會挑戰韓國八萬人在線紀錄呢！

好多Online Game都有代言人，但好似《Cyphers》找來Jolin咁強人氣就好少見，台灣仲有Jolin Cosplay遊戲角色「夜之女王─特莉薇亞」擔綱演出的電視廣告，發布會當日，Jolin都有到場，不過就冇着起特莉薇亞的低胸黑色戰衣，有啲可惜囉！

不斷追加新角色

今次發布會都搞得相當有聲有色，出場時有Rock Band加上十位Cyphers Girls跳舞，對應番台版初出時有十位能力者角色，而Cypher Girls的造型仲跟足嗰十位角色呢！至於Jolin扮演的「夜之女王─特莉薇亞」就會連同另外三名角色在今個星期六（8月4日）才會登場，想玩就要等多兩日。《Cyphers》遊戲賣點係登場角色多，好似韓版就已有三十多個角色，計埋下個星期六追加的角色，台版暫時只得14個，但開發商話會不斷更新角色，務求時刻都有新鮮感！

華麗動作鬥塔玩法

鬥塔遊戲通常玩法係十位玩家分成兩組，互攻對方的主堡，打爆對方主堡為之勝出，戰場中間還有NPC小兵；而《Cyphers》所標榜的，係結合華麗動作的鬥塔遊戲，每個角色都有連招，兼且可以做到空對地、地對空攻擊，打擊感強烈，開發商仲話唔會輸蝕畀RPG遊戲，難怪大受Gamer歡迎。地圖方面，遊戲暫時就收錄「利浦港」、「斯普林菲爾德」、「大都會」同「布里斯托」四幅地圖，兼為台版特設加上101背景的台灣專屬Loading圖，增加地域親切感。

包含韓版改版模式

有別於一般Online遊戲要不斷打怪賺取經驗值「升呢」，《Cyphers》每個角色都基本上可以用得晒所有招式，要升級的話，要不斷賺錢買道具先得；另外，等級高未必一定屈到機，畀兩個敵人包抄時都未必夠打，講合作、講策略，多過單打獨鬥。《Cyphers》最初在韓國推出時，只有一般攻城模式，不過台版就已跟足韓國改版後的內容，有齊協力模式、一般模式、積分模式同跟電腦對戰的PvE模式，即使一般攻城模式任務失敗都唔會「降呢」。如湊唔夠腳，亦可玩PvE模式同電腦開局，都幾啱港台玩家！

遊戲Cosplayer

代言人Jolin在發布會上唔玩Cosplay，Cosplay重任就交畀幾位型男索女身上，原來型男露肉仲露得多過靚女！

韓國開發商教揀能力者

開發《Cyphers》的韓國公司Neople多位高層都乘發布會來到台北解畫。講到角色方面，台版就算連同8月初追加的四名角色，都只得14個，遠遠比不上韓版三十多個。Neople代表就話好難一下子將全部角色引入台版，只可由較易操控的角色入手，目標吸引更多玩家，而台版初期會每兩周加入兩個新角色，更新速度會比韓版為快。Neople代表又話新手可以試用「火之魔女─泰拉」，她擅用火攻，對人及建築物的破壞力都較高，並且易於操控。至於Hardcore玩家可以試用「劍龍騎士─勞拉斯」，操控雖然稍難，但揮舞馬槍跟空對地劍龍奧義都有很強的打擊感，玩家不妨參考一下。

INFO

類型：線上遊戲

開發：Neople

代理：Gamania

公測日期：即日起

網址：http://hk.beanfun.com/Cyphers/