惡到出晒面HT 1/6 Bane

喺啱啱過去嘅動漫節，Hot Toys竟然將成個葛咸城搬入會場，唔只有1/4 Batman，連帶《The Dark Knight Rises》嘅主要角色，都以1/6情景亮相，當中企喺迷彩蝙蝠車上面嘅Bane，盡現電影中嘅霸氣，再細睇Figure本身，由頭雕到服裝都超仔細，實實在在重現呢個反派角色粗中有細嘅一面。

兩地聯手　超像真頭雕

由Christopher Nolan所執導嘅《Dark Knight》系列，唔只成功重塑Batman，連帶一眾奸角都有血有肉，令觀眾更易理解佢哋嘅成魔之路，好似稻草人係癲佬、小丑係無政府主義者，而Bane就係兇殘嘅恐怖分子，咪睇佢四肢發達就以為頭腦簡單，其實力量與智慧成正比，電影造型仲相當詭異，蟹爪形面具連接腦血管、五官只有雙眼外露，嚇人程度直逼《恐懼鬥室》（SAW）。為咗將佢Figure化，HT特別將頭雕分件處理，歷時長達三個月，面相由韓國嘅Lee So Young落刀，再加上JC.Hong塗裝，立體展現何謂「目露兇光」，就連頭頂青筋都Show得一清二楚；面罩就留畀香港處理，喉管分件仔細工整，美中不足係舊化塗裝重手咗，令唔同組件之間嘅顏色未夠分明，期望大貨時可以執番正啦。

大大隻　選用史泰龍Body

戲中Bane相當大件頭，頗有漫畫嘅原著神髓，皆因演員Tom Hardy特別為角色增肥30磅，HT亦作出相應措施，就係選用體形最接近嘅《The Expendables》史泰龍Body，雖然膊位及手（月爭）關節外露，外觀難免被扣分，但可動性就比包膠高得多，可以輕易擺出有力量感嘅揮拳甫士。服裝方面，原來Bane喺戲中都有唔少造型，HT揀咗其中三個Look，分別係防彈背心、長袖Tee及仿皮褸，當中件防彈背心混合咗三層布料製成，並且內藏海綿，有彈性又兼顧到凹凸質感，不過考慮到設計上跟早前嘅Captain America有啲相似，擔心量產後兩邊索帶能否保持對稱。至於配件，由於Bane主要都係打拳頭交，所以冇理由跟一大堆刀刀槍槍，隨盒就只有六款造型手掌、一個金屬地台，最大Gimmick係跟埋半個蝙蝠俠面具，傳神地重現蝙蝠俠都畀佢KO嘅架勢。

推出日期︰明年第一季

查詢︰2388 4677（Toy Hunters）