正氣妖王山口式鬼太郎
除咗主流嘅科幻動畫，就連迪士尼卡通，以及荷里活大熱嘅Super Hero都出過，山口式Figure仲可以有咩新招？少擔心啦，呢個Figure系列一向勇於嘗試，繼今年初嘅佛像系列後，最近仲打經典鬼怪日漫《Ge Ge Ge的鬼太郎》嘅主意，頭炮當然係第一男主角、「8．2」面深入民心嘅鬼太郎啦！
老老實實，細細個時見到鬼太郎，真係不以為然，既唔大隻、又唔靚仔，咁都可以做男主角？況且個樣唔多正派喎！原作者水木茂將人見人驚嘅一班日本傳統鬼怪，描寫成徒具惡樣，內心其實比人類更正直、更善良，仲會暗中出手幫人，如此風格就想帶出人不可以貌相、好人壞人無樣睇嘅道理。至於鬼太郎唔只喺一眾妖怪中已經係至Chok嗰個，而且本事多多，為人有義氣、又孝順，仲好有正義感，唔怪得面世超過半世紀，仍一直深受日本人歡迎。
變臉前先脫髮
脫髮係男人嘅大忌，不過山口式鬼太郎就透過「脫髮」做到表情多多。無論漫畫版或動畫版，鬼太郎都有半邊面畀頭髮遮住，搞到變成獨眼Look，山口式就利用呢個特點，將頭髮與面相分件處理，先拆除頭髮組件，就可以直接換上木訥、得戚或者憤怒三款面相，就連右眼部分都有三款造型任換，即係話可以變出九款唔同表情。除此之外，鬼太郎眼紅面青嘅漸變膚色塗裝，亦見出廠方落足心機同誠意，至於黃、黑橫間背心，就與內層嘅恤衫係分件製成，未有為節省成本而「啤」埋一件，成件背心可以除出嚟，幫鬼太郎擺個「輕裝」甫士。
附件誠意十足
至於Figure本身嘅關節數量唔算多，但係關鍵嘅可動部分都用晒轉輪Ball Joint，可動性依然出色，例如頸位內藏雙Ball Joint，增加仰俯角度，至於肩部Ball Joint有助雙手橫向伸展，可惜足踝Ball Joint大件咗啲，賣相似「拗柴」。配件方面，造型手掌就有七款之多，最開心係送埋相同比例嘅「眼睛爸爸」，可以裝喺頭頂或者放喺左手掌心，瞳孔上色亦相當細緻。唔只咁，隨盒仲有刻埋「水木家之」字樣嘅破舊墓碑連枯木墳場場景，同鬼太郎拍埋一齊，就忠實重現到動漫中嘅陰森氣氛，夠晒入戲。
查詢：2148 9483（精品）
Revoltech Takeya 《Ge Ge Ge的鬼太郎》立體繪卷：鬼太郎 售價：$270
隨盒備有多款造型手掌，其中左手開掌留有窿位，專為安裝眼睛爸爸而設。
由於腳掌細，為顧及接地平衡，足踝選用較大嘅Ball Joint，犧牲造型美。
服飾採用分件處理，背心拆到出嚟，留意胸、腰、腹分為三節組成，增加扭動幅度。
肩部Ball Joint有助雙手橫向展開，擺出騎呢姿勢。
頸位內藏雙Ball Joint，藉此增加仰俯角度。
拆走頭頂嘅Y形碎髮組件，就可以換上眼睛爸爸。
每款面相都有獨立眼珠，互換之下，就可組裝出九種表情。
生鬼甫士示範
怒目手指指
親子對話
得戚瞓晏覺
拆開頭髮套件，就可以換到得戚、憤怒及木訥三款面相。