Xperia Acro S東瀛大賣

上星期十號風球打到嚟，狂風暴雨唔單止搞到樹木連根拔起，唔少人仲因為撇雨滲水搞到屋企電器即場報銷，勁慘！屋企唔少家電應該都冇防水功能，不過手機就唔同，好似Sony新出嘅Xperia Acro S，就符合防塵防水標準，灰塵沙粒冇有怕，落水一米對佢嚟講都係濕濕碎！加上一體成形嘅修長和風設計及雙核心強勁機能，裏裏外外都咁吸引！

有留意開日本手機市場都知，日系機十居其九都係防水，而且仲要部部Sell外形，少啲賣點都好難突圍。Xperia Acro S不但具有上述優點，仲加埋雙核心處理器、1,200萬像素鏡頭等超強規格，單睇牌頭已經超班；難怪有市場調查指出，Xperia Acro S（即日本版Xperia Acro HD）於今年三月至五月期間，十星期成為日本市場銷量第一，認真賣得！

國際防護級認證

其實Xperia Acro S早於三月已經喺日本現身，當時亦有水貨到港，更掀起一陣搶購潮；今次行貨來港，雖然冇咗日版中較特別嘅藍色，不過就保留咗超搶眼嘅櫻花紅以及黑白兩隻大路色。最重要係新機一改以往三防機的厚重外形，其修長、方角加上幼邊框，和風味十足；另一賣點是具備IP55以及IP57國際防護等級認證，IP後第一個數字指防塵等級，「5」則代表可以做到灰塵保護，帶去沙灘絕對冇問題；而第二個數目字則指防水等級，「5」代表可以抵受低水壓水柱直射，「7」則表示可於一米水深下正常使用30分鐘，邊浸泡泡浴邊「煲粥」都冇問題。

靚芒水底取景

除咗倒瀉水、跌落水都冇有怕外，仲可以用Xperia Acro S影番輯水底寫真，皆因新機備有1,200萬像素Exmor R鏡頭，防水機中絕對超班，即場測試，發現成像銳利、雜訊亦唔多，的確唔錯！再試濕身Snap，因支援Wet Finger Tracking技術，就算喺機身布滿水滴兼且手濕嘅清況下，都仍然可以篤芒揀拍攝模式。留意的是，手機落水後會受水流影響，無法篤芒操作，不過機側設有實體快門鍵，長按兩秒左右便可拍攝，亦可半按對焦，水底拍攝唔太難！加上新機配有4.3吋720p屏幕，更備有獨家的Mobile BRAVIA Engine，對比度和飽和度都夠高，取景肯定夠像真！

變身Android 4.0

記得當時日版水貨仍然採用Android 2.3，系統嫌略過時；不過行貨出街時，廠商就幫你預載Android 4.0新系統。整體換頁、操作都非常暢順，更特別加強多媒體功能，包括改用Walkman音樂播放器、密鋪平面式的相片顯示以及自動幫你搵影片資料嘅影片播放器，介面又靚又實用。而Xperia Acro S規格亦一啲都唔弱，好似1.5GHz雙核心處理器、1GB RAM，更媲美一眾高階機；值得一提，此機除了內置16GB記憶體外，更可外加32GB microSD記憶卡，加上50GB Box雲端儲存，總共有成90GB容量，咁幾多套高清Movie都擺得落啦！

SPEC

制式：GSM四頻、UMTS

處理器：1.5GHz雙核心

屏幕：4.3吋TFT防刮防劃玻璃（1,280×720解像度）

記憶體：1GB RAM/16GB ROM、支援32GB microSD

鏡頭：1,200萬像素自動對焦、可拍攝1,080p影片

對外連接：HSPA+、藍芽、Wi-Fi、NFC、microUSB、HDMI

通話時間：6小時40分鐘（2G）、7小時10分鐘（3G）

備用時間：290小時（2G）、310小時（3G）

作業系統：Android 4.0.4

體積：126×66×11.9mm

重量：147g

查詢：8203 8863