VINCI II訓練腦筋平板教育

近年Tablet愈來愈Hit，唔單止大人鍾意玩，有時仲會畀家中小孩玩埋一份；現在的Apps確係好玩，不過未必款款都益智。呢部VINCI II平板就唔係咁講，皆因此機係專為小朋友設計，不但有個超搶眼嘅防撞「泵把」，家長仲可以為小朋友加入不同類型嘅兒童內容，聲畫俱備，邊玩邊學語言和認知，小朋友歲半就啱用喇！

紅色「泵把」唔怕撞

VINCI II平板專為18個月至5歲的小朋友而設，心水清的家長一定知小朋友最鍾意將玩具隨手掉，咁部Tablet咪隨時報銷？所以此機特別在機身四邊加入一個超搶眼的八角形紅色橡膠「泵把」以作保護，既可以畀小朋友當把手，亦可避免機身撞爛，設計夠貼心！難得是加上「泵把」之後，7吋機身都唔算太大和太重，拎上手啱啱好，小朋友應該唔覺辛苦。

足料兒童學習課程

這部Tablet採用Android系統，而廠商就特地加入了專為兒童而設的《VINCI學習教程》，仲好細心咁分為三個Level，每個Level入面都有數十個專屬兒童Apps，家長可以按照小朋友的學習進度自由選擇畀子女玩。例如最初階的Level 1，就以認識英文生字為主，不但畫面得意，而且有聲有畫，小朋友又可以邊篤邊玩，大人睇到都覺得過癮！另外仲內置《Kids Library》和《Gallery》等兒童內容，前者備有多本兒童電子書，後者則有益智卡通短片畀你睇，內容超多元化！惟要留意，部分內容需要額外購買，好似《VINCI學習教程》價錢就由$699.9起，抵唔抵就見仁見智喇！

解鎖後家長都啱用

為咗令家長更放心，VINCI II仲特設「Parent Login」，如不解鎖，便只能使用局部兒童功能，咁就可以確保小朋友唔會亂咁玩其他嘢！解鎖之後，就大人都啱用，因為一般Android功能即時全部解封，好似瀏覽器、地圖、電郵等等，亦支援官方下載Apps；加上新機配備1.2GHz處理器，當佢係一部中階Tablet咁用都冇問題，全家共用確係盞！大家要留意，新機只支援Wi-Fi上網，亦需在「Parent Login」解鎖下方能設定及連接，即是小朋友要上網，就要有家長陪同了。

SPEC

作業系統：Android 2.3.5

處理器：1.2GHz

記憶體：8GB ROM、512 MB RAM、支援32GB microSD

屏幕：7吋（800×480解像度）

鏡頭：300萬像素

電池容量：6,400mAH

查詢電郵：hongkong@vincigenius.com