全面保養凌志有Plan

想部車襟揸，定期保養一定唔慳得，不過香港人出名分身乏術，個腦已經多嘢記到爆「Hard Disk」，仲點會記實每個項目嘅檢查時間？為咗方便車主，凌志（Lexus）推出全新嘅「凌志維修保養計劃」，車主只要惠顧為期三至五年嘅服務計劃，就可享定期維修檢查及24小時免費拖車服務，部車有專業人員照顧，就無後顧之憂啦！

無論你拎架車去車房或原廠做保養，好多項目都係逐樣計錢，最後埋單條數，可能會超出預算，不過凌志CT、IS、GS與RX系列嘅車主就冇呢個煩惱，事關可以參加「凌志維修保養計劃」，範圍包括定期維修檢查、更換損耗性零件、引擎清洗服務、引擎進氣岐管清洗服務、輪胎平衡及電腦四輪定位等，套餐價錢已包材料及裝工，毋須再為額外嘅保養及維修費用而勞氣。皇冠汽車助理維修部經理（凌志車系）黃家賢表示：「一般認知需要定期檢查嘅煞車系統、換偈油及Filter等都喺計劃範圍內，不過車身損毀、配車匙及輪胎損耗等就唔包。」

計劃年期雙軌制

凌志此保養計劃分低里數（40,000km）及高里數（60,000km）兩種，收費按唔同型號而定，CT及IS車系嘅車主，參加低里數嘅三年計劃，價錢只係$28,200，五年計劃就收$73,700。喺保養計劃期間換車，或者唔好彩撞咗車用唔到，只要提交相關證明，凌志會按百分比向車主退回款項。此外，愛車之人都希望自己部車長期保持良好狀態，除咗每半年或10,000km返廠Check車外，平日仲有乜嘢可以自己檢查呢？黃家賢稱：「凌志汽車只要定期返廠檢查，基本上都唔使親自Check車，只要開車前目測檢查胎氣，甚至圍住部車兜個圈望吓已經好足夠。」

Hybrid車主小提示

Hybrid車款愈嚟愈普及，凌志本身就有CT200h、GS450h、RX450h及LS600hL等多款型號，雖然操控起嚟，混能車與傳統汽油私家車分別唔大，但黃家賢提醒各位Hybrid車主：「記住唔好遮住電池嘅散熱口，否則有可能令系統溫度上升，導致着咗提示燈。」除此之外，凌志位於葵涌嘅服務中心，就以3S概念為主體，既有維修及零件銷售服務，又有新車陳列區，提供多元化服務，代理就以CT200h為例，進行例行檢查嘅話，最快可以即日完成，即係朝早放低車，下晝就攞得番。

查詢：2880 4130（Lexus Service）