日本限定Apps高達超好玩

日本研發遊戲一向充滿特色，不但畫面夠靚，可玩性亦相當高。而近年手機Apps亦成功殺出一條血路；當中唔同國家嘅AppStore都有地區限定Apps，今次就推介大家登入日本AppStore，入面有大量勁好玩嘅小遊戲，其中《Gundam Royale》提供免費下載之餘，仲可以線上同其他用家對打，用機動戰士互揪，高達迷豈能錯過？

《Gundam Royale》高達互揪

下載費用：免費

iPhone向來冇乜以高達為主題嘅遊戲，《Gundam Royale》遊戲開始時會派隻低階機動戰士，好似吉姆畀你使用，透過「出擊」就可以賺取GP資金及經驗值幫佢升級，完成特別任務或「鬥技」後更有「扭蛋」機會，有機會抽到RX-78等高階機體，攻防能力都勁好多！不過要留意，氣力Bar會隨着戰鬥而扣減，更甚會停止運作，要等時間先慢慢回復到。

下載小貼士

原來AppStore會因應用家登記地區而篩選程式，如欲下載日本限定Apps，首先就要登記一個以日本為地區嘅新帳戶，竅門在於要隨意填一個日本地址，但要正確填入相關郵政編號，有網站就建議參考日本Apple Store門市嘅電話同地址，咁就包保冇錯喇！

《プロ野球PRIDE》育成棒球隊

下載費用：免費

棒球係日本極受歡迎嘅運動，職棒比賽仲不時爆棚添！這App就畀個機會你育成一隊自己嘅棒球隊，可以自己挑選球員之外，仲可以幫擊球手練習提升技能呢！最正係此App獲日本野球機構承認，兼且有500名實名球員，玩得特別投入。

《三国志演義カードデュェル》遊戲卡比併

下載費用：免費

以名作《三國演義》做背景，魏、蜀、吳三國的將士都變晒做卡片畀你舞。同其他Card Game一樣，各人物及道具都備有不同的技能及能力值；玩家除了要親自招募士兵外，亦要為各大戰役布陣，絕對鬥智又鬥力。玩到咁上下，記得挑戰其他玩家喎！

《Puzzle & Dragons》方塊殺敵

下載費用：免費

玩法同一般寶石方塊遊戲玩法差唔多，最特別是加入屬性以及殺怪獸嘅背景。唔同顏色嘅方塊其實代表火、水、土、光、暗五種屬性，相生相剋，只要串連到三個同色方塊，就可以發動單一攻擊；串連到五個同色方塊更可以攻擊畫面上所有敵人，過癮！

《農園ホッコリーナ》可愛育成

下載費用：免費

介面、玩法都同《Happy Farm》極似，不過好玩在可以種瓜、種花之外，仲可以養動物添。玩家可以隨時改變農場背景以及圍欄，打造一個個人化嘅小農莊；最互動係加入社交網絡功能，可以去朋友個農場幫手，難怪有咁多日本女玩家畀呢隻App迷倒啦！