HT 1/6 Dark Knight夜神重裝Take 3

但凡社會動盪不安、市民孤立無援，就分外渴求有「英雄」橫空降世，可惜香港人冇葛咸城嘅市民咁好彩，皆因佢哋有蝙蝠俠打救！萬眾期待嘅Batman三部曲終於嚟到最後一集—《蝙蝠俠-夜神起義》（The Dark Knight Rises），向來對Super Hero有情意結嘅Hot Toys當然支持，電影下個禮拜先上畫，HT版新夜神已經有辦睇，盔甲大翻新，加埋超像真頭雕，為最終章畫上完美句號。

佢唔識飛、又冇異能，但喺早前嘅外國英雄選舉中，蝙蝠俠力壓超人及蜘蛛俠，成為世界第一英雄，受歡迎成咁，實在多得基斯杜化洛倫（Christopher Nolan）唔少，為蝙蝠俠重新注入人性，黑色風格更令續集《The Dark Knight》炮製出逾10億美元嘅全球票房，口碑收入雙贏。嚟到最終章，故事發生喺上集八年後，蝙蝠俠體能大不如前、老態畢現，由Kojun落刀、JC.Hong塗裝嘅新版頭雕正好忠實重現，雙眼下垂加眼袋鬆弛，如此頹廢Look實在大異於傳統嘅Batman形象，今次仲連鼻樑嘅息肉都做埋，比舊版頭雕更加Human-being。

頭罩Look三款嘴形

真人頭雕改頭換面，估唔到頭罩Look都有改良，首先面形比舊版飽滿咗，雙耳就稍為改短，令整個面相更自然。另外，下巴部分備有冷靜、憤怒及咬牙切齒三款嘴形更換，今次再非磁石黏合，不過改用夾件方式，換面起嚟冇以前咁方便。作為DX系列，例牌梗係有PERS轉眼系統，但只限頭罩Look，真人頭雕欠奉，還幸後者嘅頸圈位係獨立部件，可動性極高，唔怕變成「梗頸四」。

反底紋戰衣提升質感

蝙蝠俠嘅戰衣經過多代改良後，質料及設計不斷更新，除咗胸口、手臂及大腿裝甲全部變成獨立部件，令外觀更有立體感，今次嘅HT胸甲就創新採用「反底紋」設計，即係喺透明甲片嘅背後印花兼上色，令花紋更持久，亦可做到碳纖嘅質感，絕非一般印花可比。另外，蝙蝠俠每集都有新武器，蝙蝠槍、蝙蝠鏢及Mini Mines都只係例牌貨，第三集就新增EMP機關槍，不過唔會射子彈，而係發放電磁波癱瘓附近嘅電子儀器，貫徹蝙蝠俠唔殺人嘅作風（對方硬係要送死就另計啦）， HT版Figure亦都做埋，仲可以扣喺另購嘅Bat-pod車身上，更加入戲。

Bat-pod重出江湖

蝙蝠俠冇異能唔緊要，事關有大把重型裝備傍身，上天落海都難佢唔倒，早喺第二集《The Dark Knight》時，HT就為呢位大英雄推出過電單車Bat-pod，今次就趁第三集上畫再度加推，比例1/6，無論係第二集或第三集嘅同廠蝙蝠俠Figure都坐得落，至於高度像真嘅細節加埋着燈Gimmick，當然唔少得。

預訂動漫節限定版

HT喺今屆動漫節會出邊幾款限定Figure？相信大家都估咗好耐，謎底終於揭曉，就係頭盔Look嘅Captain America、特警裝嘅Lt.Jim Gordon，以及《魔盜王》第四集嘅女主角Angelica。今、明兩日門市Toy Hunters將會接受VIP優先預訂，每位限量預訂一套（預訂時需繳付全數金額）；至於非VIP粉絲亦可於即日至明日嘅10:59am期間進行網上登記，每人只限登記一次，不過由於限量每款600套嘅關係，HT將以抽籤形式選出，及以電郵形式通知成功取得購買限量品資格嘅顧客，顧客需親身於指定時間到Toy Hunters繳付全數金額。隨後根據訂單上嘅指定日期，攜同訂單正本於指定時間到動漫節嘅HT展區（F18）領取Figure，詳情請留意HT網頁、Facebook及新浪微博專頁嘅最新消息。

HT網頁 http://www.hottoys.com.hk/

HT Facebook專頁 http://www.facebook.com/hottoys

新浪微博專頁 http://weibo.com/hottoyscollectibles

Toy Hunters Facebook專頁 http://www.facebook.com/toyhunters

查詢︰2388 4677（Toy Hunters）

＊圖中為試辦款式，與正式推出的版本或有若干分別。