《London 2012》屋企體驗運動熱
仲記得細個時玩運動遊戲，要似足「高橋名人」高速連打A、B掣，撳到掣都爛，手指又起晒枕，邊似得呢款今屆倫敦奧運正式官方遊戲《London 2012》咁，用新操作系統，雖然一樣要連打，不過唔使捽到手指頭都爆，考技巧多過連打速度。這遊戲更首度對應PS Move以及Kinect，真係可以身體力行，感受大賽氣氛，唔再只流於手指運動會了！
考技巧多於連打
今次呢款《London 2012》製作真係非常認真，而在新製作技術幫助下，場景同動作都做到真嘅一樣，以高清呈現，靚過睇直播，值得買嚟玩同收藏。以前玩講求速度嘅游水同短跑項目，連打速度愈快當然愈着數；而今次所用嘅系統，就要求玩家連打速度維持喺速度值頂端的綠色小方格內，連打速度太慢當然大落後，太快又會變紅，會因過分消耗體力而減慢速度！隨着路程，綠色小方格會愈縮愈細，要一直維持在合標準高速並唔容易，筆者試玩近十次，跑200米都能做到20.1秒左右，但只能拎到銅牌。
部分項目支援體感操控
至於50米自由泳就考大家左右手的協調性同時間掌握技巧，而且操控時更接近真正游水動作，除咗撳掣跳水同在水底潛泳時要連打加速外，之後每划一吓手，都要梅花間竹地將左右Analog掣向下拉，而且要等畫面上泳手隻手拉直先可拉另一邊Analog掣划水，心急狂拉反而會幫倒忙，同樣講究技巧，大人小朋友都應該掌握得到。至於部分運動項目更支援Kinect或Move操控，好似射箭、獨木舟就可以支援到體感操控，雖然可用體感操控的運動項目只有約十個，數量唔多，但要將全部運動項目轉化成體感都好有難度，玩到好似奧運選手咁辛苦就未必有人鍾意。《London 2012》收錄咗約40個運動項目，當中如划艇、場地單車、沙灘排球、跳彈床同雙人跳水都係首度加入官方遊戲的新項目。除咗可以單機同朋友一齊玩Party Play模式，另外都可以連線挑戰世界各地高手，不失為一隻交到功課嘅應節遊戲。
INFO
類型：運動
開發：SEGA
平台：PS3、Xbox 360
推出日期：已推出
售價：$308
查詢：2359 7998
場地單車賽係今集遊戲的新增項目。
高清畫面輸出下，效果靚過電視直播。
跳水項目設有三米彈板同十米高台項目，而雙人跳水就係新加項目。
運動員賽後的興奮同失落表情都做得幾像真。
體操項目唔多，只有跳彈床以及圖中所見的跳馬項目。
《London 2012》已收錄咗大部分奧運正式比賽項目。
遊戲共收錄咗36個國家的運動員代表。