惡搞機械熊

正所謂：「男人愛高達、女人唔明白」，Bandai為免廣大嘅男性玩家再被身邊女伴投訴，竟然諗出「毒招」，推出Beargguy模型。Beargguy嘅前身係自護軍嘅水陸兩用機動戰士Acguy（香港粉絲稱之為「龜霸」），五短身材加埋自護軍嘅招牌獨眼，靚仔肯定冇佢份；點知Bandai將Acguy改頭換面，就連背脊嘅噴射引擎都改成書包，旁邊再掛支牧童笛，變身為Cute到爆嘅Beargguy。呢隻「熊」真係吸納咗唔少女玩家，仲將佢變出多不勝數嘅新版本，人人爭住錫。可憐內地嘅熊膽養殖場內嘅活生生熊Bear Bear，就要日日生不如死。

Dick Editor

可愛生招牌

英國希思路機場內嘅一間百貨公司，擺咗隻真人咁高嘅熊Bear Bear做生招牌，睇怕唔少女生及小朋友，都會畀佢吸引住；深水埗元州街亦有間老牌模型店，長時間擺隻吹氣招財貓迎賓，最近招財貓要稍事休息，於是店主請來巴魯坦星人客串，仲喺社交網站留言，歡迎大家Cosplay成咸蛋超人，到場同佢合照留念。咁鬼馬、又有人情味嘅舖頭，香港仲有幾多間？原本都有唔少嘅，如果有良心業主唔大幅加租嘅話……

地點：香港、倫敦

Dick Editor

吊高嚟賣

話說小記早前出Trip，喺德國法蘭克福機場嘅Check-in位置，發現有好多人抬高頭望嚟望去，唔通有UFO降臨地球？原來係天花板有一塊立體廣告牌，牌前牌後都掛咗一個着晒西裝、睇緊雜誌嘅假人；咁出位嘅布置，原來係當地一份財經周刊嘅廣告牌。唔通間廣告公司大打吊高嚟賣嘅心理戰？

地點：法蘭克福

Dennis Reporter

唔係老點！

有次揸車經過機鐵九龍站對開，見面前有塊寫住「所有目的地」嘅臨時路牌；咁講法，唔通沿住呢條路，揸到上北京，甚至登陸月球、火星都得？就算資深嘅駕駛者，都未必知道呢塊路牌嘅真正意思，何況係新牌仔！換轉係你，又知唔知呢塊路牌嘅真正意思呢？

答案：

原來但凡「所有目的地」嘅臨時路牌，左右都會有指示唔同目的地嘅路牌，就以此圖為例，無論你想去左邊嘅「機場快線站」，或者係右邊嘅「香港（西）、葵涌及大嶼山」，都可以沿住中間嘅「所有目的地」方向去到，各位揸車之友記住喇！

地點：香港

Dennis Reporter

同鵝唔同命

自從香港發生禽流感，大家都聞雀色變，甚至乎想趕絕晒公共地方上嘅雀仔。筆者之前去咗英國曼徹斯特Waterfront Quay一轉，嗰度嘅市中心有條運河，河上有唔少水鴨、天鵝棲息，甚至走上岸邊大搖大擺咁散步，仲同當地人相安無事、和平共處。筆者問過當地居民：「唔驚禽流感咩？」佢哋好淡然咁話：「唔好手多多掂佢哋咪得囉，況且佢哋一代又一代，喺條河住咗好耐，有乜理由趕佢哋走喎。」香港人又幾時先有咁嘅胸襟呢？

地點：曼徹斯特

Dick Editor