檳城路邊榴槤派對

香港人食榴槤，都是買返屋企匿埋慢慢歎，但在檳城卻是另一番風景，一到5月至8月，街頭巷尾都會出現以貨車化身的流動榴槤檔攤，檔邊還擺放了枱櫈，不少食客打包之餘，也愛坐低即買即食，榴槤迷可以聚首一堂痛快品嘗榴槤之餘，又可跟同道中人交換心得，熱鬧猶如街頭榴槤派對。

即開即歎

每逢當造季節，大班人在街邊貨車檔享用榴槤的情景，於檳城隨處可見，當中更不乏人氣明星檔，其中一檔是位於安順路（Anson Road）的阿龍。檔主阿龍細細個就跟父親在這裏開檔，不經不覺已近30年，深得當地人捧場，除了全部榴槤都在著名產地浮羅山背（Balik Pulau）入貨外，阿龍更會親自試食檢定，再向園主訂下覺得好的榴槤樹，由於對貨源要求嚴格，所以若當天買不到好貨色，阿龍便索性不開檔，吃靚榴連都要看運氣。

阿龍的攤檔擺在一個7人足球場大的草地上，感覺開揚又舒適。當地人食榴槤相當刁鑽，會因應不同比例的甜苦濃度、軟硬口感、色澤形狀、核的大細等分成不同品種，我們試了阿龍推介的6款榴槤品種，名稱也夠有趣：D15、豬哥口、紅肉仔、紅肉604、只核及黃薑。逐個品嘗，發現不同品種的分別相當明顯，我偏好其中的「只核」，入口香濃得來帶着陣陣苦澀，頗黏口，食完後喉嚨還有股回甘。愛甜的別錯過紅肉仔，肉身黃中透紅，入口竟是濃郁的甜味，是榴槤初哥的首選，跟一班人齊齊食，大家臭味相投，吃得更開心。

Info

簽證：持特區護照或BNO毋須簽證

旅行團：EGL檳城榴槤4天團，安排榴槤任食自助餐，參觀世界文化遺產檳城文化街、康華麗斯古堡等，團費HK$2,989起。

查詢：3692 0888

貨幣：RM1約兌HK$2.5

天氣：7月份氣溫約23℃-31℃

阿龍榴槤

電話：（60）19 412 1616