《Mobile Suit Gundam Battle Operation》「無料」任砌

經濟學常言：「呢個世界冇免費午餐。」即是想要好嘢就要付出。但小記最近發現，竟然有公司唱反調！日本PSN剛推出PS3線上動作遊戲《Mobile Suit Gundam Battle Operation》，打正招牌大Sell「無料」，即日文「免費」咁解，由下載、遊玩、以至儲素材砌機，統統唔使錢！只要閣下事前登記日本PSN帳號，就唔使落機舖挑機交學費，都可以享受具迫力的MS隻揪之樂。

全程免費之謎

想免費打機，第一件事係要先登記日本PSN帳號。程序跟香港PSN帳號一樣，只需留意居住地點要選擇日本，以及選用日本電郵地址；至於填寫當地縣市及Post Code時，大家大可參考平時日版Game碟背後地址即可。遊戲本身只有線上模式，玩家可開Room作最多12人激戰，但需要付出「出擊Energy」方能出戰，而且一旦消耗後就必須登出，再重新累積，可見免費的背後係要付出時間。不過好在連同收集機體設計圖、關卡等都不存在「先收費後解封」的情況，玩家大可放心煲機。

格鬥選項咪揀錯

遊戲規則相當簡單，雙方需在八分鐘內互相廝殺，鬥搶陣地，最後總結得分多寡來決勝負。故戰場上會設置多個中繼據點，作為機體復活之用，玩家可傾力搶奪，增加回復靈活性。機體種類方面則分成三種，分別是白刃戰用的 「格鬥」 、中距離作戰的「汎用」、後方射擊的「支援」，三種機體相沖相剋。此外，當玩家使用「衝撞」擊中敵人的話，便會進入格鬥模式。此時雙方畫面將顯示「連續攻擊」、「毆打」、「投擲」三個選項，如防守方的選擇跟攻擊方相同，則可成功迴避對方，否則就要承受巨大傷害，完成戰事亦會獲得武器或開發設計圖，作獎勵用途。

百搭士兵任務多

玩家除了能駕駛聯邦及自護多款夢幻機體外，也能選擇以士兵身份玩遊戲。以兵仔作視點這噱頭並非新鮮，查實早在XB360的《Gundam Operation:Troy》已試過水溫，可惜當時主線過於側重士兵作戰，令難度激增，吸引力銳減。今次廠方從善如流，給予士兵清晰定位，如深入敵陣執行爆破、搶佔中繼據點、攜帶修復包為機體進行復修等工作，就必須以士兵為執行單位。

INFO

類型：動作

開發：NAMCO BANDAI Games

平台：PS3

人數：多人連線

推出日期：已推出

售價：免費

網址：http://pgdp.channel.or.jp/gundam/ps3/index2.php