《Super Monkey Ball》體感搶蕉

《Super Monkey Ball》搬上PS Vita平台，相信不少玩家都預期一定會引入體感方法，例如傾斜機身嚟「轆」猴子球；但係，咁同智能手機賣緊US$2.99的體感遊戲有咩分別呢？所以SEGA就聰明地加入對應到PS Vita機面跟機底觸控板的迷你遊戲，甚至乎可玩埋AR擴充實景捉精靈，以及用相機影低任何物件來做遊戲版圖，趁今日推出新白色PS Vita主機，都值得買嚟用新操控方法體驗呢款造型可愛又簡單易玩嘅老牌遊戲！

影相場景DIY

以往嘅《Super Monkey Ball》都係用手掣玩，控制猴子球鬥快「轆」到終點兼且食盡地圖上的香蕉，玩法簡單易上手，加上角色造型可愛，果真大人細路都啱玩！今集搬上PS Vita平台，當然要改吓操控方法，在單人模式就可以靠傾斜PS Vita主機去控制轉左轉右或加速減速，務求限時內執香蕉衝終點；呢種玩法大家都應該唔會陌生，但若嫌體感操控有難度，一樣都可以揀番用Analog掣控制。遊戲仲有一個特別設計，就係唔一定要跟住預設場景去玩，可用上鏡頭影低任何圖像，製成一個新場景，夠晒新鮮感。

擺直機身打枱波

同家用版本最唔同係今集加入了好多體感迷你遊戲，可以用盡PS Vita機身的前置、後置觸控板陀螺儀，仲可以支援多人同機齊齊玩。譬如迷你遊戲「數字球」跟「撞球」都需要將PS Vita主機直向把持，然後捽畫面將猴子球撞向預定目標，「數字球」玩法同美式桌球相似，鬥快擊中順序號碼波，嫌難度低仲可揀「Random」玩法，數字會唔依次序亂出。至於「撞球」就容許4個玩家以回合形式進行，「轆」到地圖中間的旗仔有分外，仲可以諗計將對手撞落場景內隱蔽的地洞得分。

左右手要協調

點先用得着機背觸控板？遊戲入面有個名為「Monkey Rodeo」迷你遊戲就用得着，靠篤機背令猴子彈來彈去，在有限時間內蒐集香蕉，並可以支援四人連線比賽。至於另一個迷你遊戲「Pixie Collect」就可用埋後置鏡頭AR玩法，透過後置鏡頭捕捉虛擬場景上的小精靈，將所有PS Vita的獨特玩法都共冶一爐。但玩落最有挑戰性反而係利用左右兩個Analog掣控制兩個猴子球行兩面唔對稱賽道嘅「Love Maze」，左右腦唔協調的話會好易跌落深坑Game Over，而且場景內有唔少「陰濕位」，一定要停一停等埋另一邊先行動，唔係兩者距離太遠又會Game Over。

INFO

類型：解謎動作

開發：SEGA

平台：PS Vita

推出日期：已推出

售價：$328

查詢：2359 7998