App士多

《Pocket Planes》航空大亨

平台：iOS 5.0或以上

下載費用：免費

擴展機場藍圖

App Store上玩機場模擬的遊戲都唔少，更何況《Pocket Planes》畫面仍然用上低解像度「格仔」顯示，點解仍會跑出？最大原因係遊戲內容好玩得嚟又有深度，足以令人廢寢忘餐，而且更係免費！《Pocket Planes》係由去年出晒名，好多Apps抄佢嘅《Tiny Tower》設計小組開發，開始時可以揀選喺六大洲任何一個地方開展航空事業，最初只係得幾個機場仔同得架一兩個座位的飛機仔，要Unlock其他機場同飛機就要靠自已。

賺綠鈔最重要

要賺大錢當然要識得規劃路線，如果航機上所有乘客或貨物都係去同一地點，更會額外獲得25%獎勵；但當然每架航機的續航力都有偏差，最初可用到的航機航程超短，要小心安排。而下一步係開拓機場，機場需要用錢買，Class 3大型機場好似北京、東京、倫敦等盛惠$51,000，其實都幾貴，但買額外航機配額仲貴，買到十零架以上就要超過$300,000先得。買飛機唔係用Coins，而要用綠色鈔票（一張價值五百Coins），一定要靠接載肯付綠鈔的乘客或飛行途中從畫面執先得，可遇而不可求。有冇更快捷的方法？有，最平畀$8港幣就買到20張綠鈔，$318更買到5,000張，唔知有幾多人肯畀呢？

《Babel Rising 3D》阻建巴別塔

平台：iOS 5.0或以上、Android 2.2或以上

下載費用：$23（iOS）、$42（Android）

場景升級3D

小記一直對God Game有啲偏愛，舊年就最鍾意手機遊戲《Babel Rising》，在畫面上捽出各種指令，將諗住興建巴別塔的巴比倫人打低，題材新鮮玩落又有趣味。最近廠方就出咗續集《Babel Rising 3D》，顧名思義係將舊版本的2D場景升級做3D，而玩法都係照舊，即係運用一切神力阻止巴比倫人起塔。

神力比上集強一倍

新版本遊戲設有15個單人任務，而神力方面分為火、空氣、土同水呢四大元素，只要儲夠神力就可發揮呼風喚雨的能力，召喚出閃電、龍捲風、落石、冰雹、大地震、海嘯等天災，消滅一波又一波前來起塔的建築工人、搬運工人同牧師，而所能運用的神力更係第一集的兩倍。在3D設計下，無論係建塔過程以至天災威力都比上集加強咗好多。不過神力有限，要制止巴比倫人起塔都係用真金白銀實際啲，可透過In-App Purchase買神力，此乃現時好多新手機遊戲的賺錢方法。

《Bridge Constructor》起橋考知識

平台：iOS 4.0或以上

下載費用：$15

可能大家都曾經玩過PC上的Flash版《Bridge Constructor》，要喺很少的預算下，利用有限的工具搭建一條橋畀汽車甚至貨車通過。玩法簡單，設30關，點可在有限資金下，唔會變成豆腐渣工程呢？好考大家對力學的知識！

《Expedia Hotels - Book a Room》隨時訂酒店

平台：Android 2.1或以上

下載費用：免費

除非報團或買Package，否則旅行時最頭痛一定係Book酒店，要揀間啱自己的酒店隨時上半日網先搵得到。《Expedia Hotels - Book a Room》App力求簡單，只需要篤四吓畫面就完成Book房手續，仲有20,000城市嘅30,000間酒店可揀，唔使再頭痛啦！

《James Noir's Hollywood Crimes》荷里活推理

平台：iOS 4.2或以上

下載費用：免費

智力推理遊戲都要講包裝，好似《James Noir's Hollywood Crimes》就用上1961年的荷里活做背景，連遊戲的場景都跟足60年代電視節目咁話。推理遊戲都算做得幾豐富，包括有2D及3D的圖畫、數字、顏色等40個遊戲，搭車時候都可以動腦筋。

《Glassboard》私隱相簿

平台：Android 2.2或以上

下載費用：免費

要同屋企人或親密朋友Share相簿齊齊睇，用社交網絡或者網上相簿始終唔穩陣；《Glassboard》就專門為高私隱度相簿分享而設。App內唔需要設定Privacy私隱權，因為相簿只係得獲授權的用家先睇到，不過穩陣還穩陣，放慾照還是可免則免。