港產大作Q版烏索普
今期《One Piece》嘅商品搞作特別多，這邊廂Bandai啱啱宣傳《One Piece》人物AR卡，那邊廂港產Legend Studio嘅Q Power系列，亦密鑼緊鼓炮製路飛一幫嘅《Strong World》造型，除咗早前已經上架嘅路飛外，仲有啱啱加入嘅烏索普。
頭炮路飛一身西裝Look，Q版比例夠得意，可惜Detail位仍有待改善，至於第二彈烏索普嘅造型及Gimmick，就有明顯改善，同日本製品相比有過之而無不及，武士Look雕功精湛，巨角頭盔、護身裝甲及右手圓盾，都用咗更具金屬感嘅塗裝，而且略施陰影，立體感出晒嚟，加上豐富嘅表情組件，可玩性甚高。再者，武器亦有大炮或彈射器二選一，而且除咗頭盔，可以Show埋原本嘅風鏡連頭套特徵，咁Detail，《One Piece》粉絲肯定唔買唔安樂！
查詢：2148 9483（精品）
左：Q Power烏索普（Strong World Ver.）售價：$320
右：Q Power路飛（Strong World Ver.）售價：$278
隨盒備有電影版嘅大炮（上），木紋處理像真度高，槍管亦有逼真嘅金屬塗裝。
配件認真豐富，換眼噱頭夠晒驚喜，再度省靚「香港製造」呢個招牌啦！
頭炮路飛已經數度斷市，緊接烏索普就係卓洛及山治兩位人氣角色，《One Piece》粉絲要密切留意。
武士頭盔嘅着脫機關好簡單，仲保留咗原來嘅風鏡連頭套特徵，換埋彈射器就可以輕裝上陣。