我狂．我笑．故我在HT DX Joker 2.0

一句「Why so Serious﹖」，唔只令《The Dark Knight》成為經典，亦令Heath Ledger飾演嘅小丑，進身為最令人入腦嘅奸角之一。

《Dark Knight Rises》上映在即，Hot Toys炮製1/6嘅Batman及Catwoman亦係意料中事，估佢唔到係搶閘推出咗1/6 Joker 2.0改良版，頭雕、服裝、配件都大幅改良，最重要係整多個狂笑Look，念舊之餘仲Serious成咁，難怪收訂首日大排長龍，搞到玩家都Serious埋一份。

笑Look最驚喜

上一款小丑係HT嘅DX系列頭炮，水準之高成為Figure迷志在必得嘅收藏，正因如此，現時市場上嘅散貨極少；今次HT推出2.0版本，既為修正之前嘅不足之處，同時亦畀向隅嘅玩家一個補購機會。頭雕繼續由Yulli及JC.Hong兩大高手主理，仲有嚴肅及狂笑兩款任換，前者大執嘅地方唔算多，最明顯係加深咗嘴部疤痕及溶妝程度，不過臉頰變得飽滿咗，神似度反而打咗折扣；還好狂笑Look夠晒驚喜，首先1/6 Figure出呢款表情已經相當罕見，而且喺上乘嘅雕工之下，將小丑嗰種陰沉、瘋狂表露無遺，美中不足係頭髮仍然用啤膠，雖然帶出層次感，但係改用植髮嘅話，相信起伏會有更多變化。

為善送Parts

有個觀音頭，冇理由跟個掃把腳，HT於是重製Body，收窄膊頭兼且略為瘦身，仲搵埋本地著名人偶服裝設計師Kato擔任「服裝指導」，用更薄、更軟身嘅布料縫製大褸、背心及花恤衫，Full Gear上身都唔會臃腫。配件方面，繼續DX系列嘅大堆頭傳統，有齊機關槍、霰彈槍、手槍、三把刀仔、啤牌、美金、手銬同鉛筆，仲有巨型布景板及膠製桌椅，令玩家可以Set番小丑喺問話室被拷問一幕！另外，非VIP會員落訂時只要捐出$150予聯合國兒童基金會，就可獲贈小丑面具及引爆器兩款Bonus補品，不過講明先，Joker 2.0戴唔落個面具o架，惟有留畀其他Figure用啦！

零售價︰$1,680

預售價︰$1,630

推出日期︰今年第四季

查詢︰2388 4677（Toy Hunters）

＊圖中為試辦款式，與正式推出的版本或有若干分別。