雪糕大獎得主就係……

夏日炎炎，最痛快嘅消暑策略莫過於吞雪糕落肚，好味道兼透心涼。諗落雪糕口味多、粉絲也多，實在可以搞個頒獎典禮，歌頌雪糕有多好。以下就係專為雪糕而設嘅頒獎禮，各位請畀Like！

Chiu Reporter

海狗拯救隊！

近排天氣又熱又濕，小記終於忍唔住去西貢玩水。原來唔止人類，連動物都有同感；話說當日滑水之際，竟然見到船家嘅兩頭狗狗，喺遠處游水，加埋剛剛跌落水嘅友人甲，仲以為狗狗嚟拯救佢呀！

地點：西貢

Boris Reporter

天氣先生

度假勝地泰國蘇梅島，人人都曬得一身古銅色健康肌膚，呢幾位猿先生都一樣，仲好識保護雙眼，戴晒黑超歎日光浴添呀！再睇埋佢哋個表情，簡直係天氣先生上身！

地點：蘇梅島

Ying Reporter

大排廁

香港鄉郊地區常見嘅流動公廁，通常都一個起三個止；巴西里約熱內盧巿中心某處，竟一連擺放咗50個流動廁所。第一個感覺當然係兩個字「壯觀」，然後就諗到一個有趣問題，如果喺其中一格遺留私人物品，想返轉頭攞番，嗰吓我諗都幾頭痕。

地點：里約熱內盧

Konnie Reporter

免死豬牌

呢隻係農場待宰肥豬？非也！其實係生活質素比你同我都好得多嘅台南農場幸福豬，佢有名添呀！叫貝貝。而佢係有免死金牌，口喝就飲天然山泉水，唔使做，冇嘢愁。敢問各位葡萄係咩味？

地點：台南

Seine Reporter