惡人谷新體驗《3D古龍群俠傳Online》

十年人事幾番新，十年前《古龍群俠傳》代言人是當時剛上位的Twins，到今期推出的《3D古龍群俠傳Online》竟然用上八両金扮李大嘴、Cammi扮屠嬌嬌同Rainbow扮蕭咪咪，落差真係大！當然遊戲方面的改動亦相當大刀闊斧，3D造型不在話下，今次更將上集的刀、槍、拳、劍、棍同暗器融合轉化成全新六大武學，再加上五行相剋的罩門戰鬥系統，以及其他RPG遊戲常有的寵物系統，玩家可帶同「侍寵」出戰自動搜怪！

每周更新十大兵器譜

《3D古龍群俠傳Online》全新六大武學流派分別有屬於重甲系嘅「戰拳」跟「貫槍」、輕甲系嘅「二劍殺」跟「天外銃」，以及布甲系嘅「快劍」同「撩琴」。重甲系着重力量，輕甲系着重遠距離攻擊，而布甲系則着重氣功，玩家可根據唔同喜好而選擇，仲可以向唔同勢力的小說人物「借兵器」。為咗討好玩家，遊戲融入小說人物百曉生所編寫嘅「兵器譜」，每周經過一輪角逐後更會重新制訂兵器譜，只要手持十大武器就可得到神兵無雙技，殺敵就易如反掌，呢個新設計又確實幾有趣！

帶「侍寵」出戰尋怪物

戰鬥系統方面，同上集同樣用上五行相剋的罩門戰鬥系統，更導入「QTE快速反應」玩法，只要掌握敵人的弱點就能使出致命一擊！好玩之處在於遊戲入面集多個流派近百種武林絕學，所演變出的組合非常多，對比以往PK戰明顯進步得多。新3D版本另一有趣的玩法係加入寵物設計，可以帶同「侍寵」出戰。玩家可以提升「侍寵」能力，幫手尋找怪物以及提升採集效率，外觀亦會隨着能力而有所改變。遊戲中亦設有稀有寵物，但一定要在特殊劇情先可得到。一般MMORPG遊戲中都有的幫會設計，在《3D古龍群俠傳Online》中就演變成武林莊園，可用上江湖勢力召集古龍筆下知名俠士幫手尋找寶物，再換取遊戲內的虛擬道具，仲可以生產稀有的材料來鑄造武器同防具，升級靠晒佢！

INFO

類型：MMORPG

開發：智樂堂

代理：Gameone

推出日期：已推出

售價：$10（重定兵器譜新手版）

網址：http://3dgl.gameone.com