夏日手機App輕鬆涼浸浸

望住個陽光普照嘅天空，又係時候釋放自己同陽光玩遊戲！不過撞正雨季又幾十度高溫，有時出街行番轉都覺得辛苦。如果你有部iPhone喺手的話，就唔使咁苦惱，皆因有大量以夏天做主題嘅Apps，輕鬆就可以感受夏日氣息，好爽呀！

《Kitesurf》風箏衝浪好舒暢

近排日日都超過30℃，間中仲好猛太陽，隨時未出到海都已經曬燶咗。想玩水上活動降吓溫的話，《Kitesurf》可以話係不二之選；此App模擬風箏衝浪運動，將部手機左揈右揈就可以循序漸進做出Window、Board、Jumping等花式，安坐家中都可以玩消暑嘅水上運動。

下載費用：US$1.99

支援平台：iOS 3.0

《I Luv Ice Cream!》雪糕抵住買

行街流到成身大汗，食番個冰凍嘅雙球雪糕你話幾盞呢！香港土炮推出的《I Luv Ice Cream!》App，可以話係專為雪糕精而設，皆因App收集咗全港大部分雪糕店及乳酪雪糕店嘅資料及位置，大家常食嘅Häagen-Dazs、Ben & Jerry's當然有，而且仲可以連接至雪糕店Fan Page獲取折扣或其他優惠，慳番幾蚊就可以買多杯慢慢食啦！

下載費用：免費

支援平台：iOS 4.0

《歐國波Something》索女睇波團

上星期歐國盃開鑼，一眾球迷梗係要晚晚睇啦！一班人睇波點都要搵啲嘢助興，咁呢個《歐國波Something》App就一定啱你。這App專為今屆歐國盃而設，除了「即時戰報」、「實況報道」、「名家論戰」、「即時新聞」等賽事消息之外，更同時備有賽事賠率等資料，鍾意睇波嘅朋友一定啱使。

而最特別係加入咗唔少過癮元素，好似有李丞責師傅以玄學角度分析球員同球隊嘅「風水足球」；集女神19式、DIY噴血球衣、明星講波等娛樂短片嘅「娛樂台」，仲有周秀娜等模特兒性感登場添，肯定夠晒養眼啦！球迷仲可以玩埋「歐國妹選舉」，揀出心目中的歐國盃代言人，話唔定更有機會參與決賽睇波團！

下載費用：免費

支援平台：iOS 4.3、Android 2.3.3

《Celsius Free》唔開App睇天氣

烈日當空，曬兩曬隨時燶！唔想出到街熱死，出門口當然要睇吓天氣報告。有別於一般天氣App，《Celsius Free》會透過主頁Icon右則嘅紅色圓點顯示現時溫度，唔使開App或者拉下Notification Area都可以得悉天氣狀況，好方便！

下載費用：免費

支援平台：iOS 4.1

《Hong Kong Beach Water Quality Forecast》水質全面睇

如果真係想落海游水的話，都一定要事先睇吓海灘嘅水質情況先好出發。新App由香港大學設計，每日提供香港16個主要泳灘的水質資料，就算有紅旗、鯊魚旗都一樣會話你知。為保健康同安全，落水前點都要睇一睇！

下載費用：免費

支援平台：iOS 4.3