索女．喪屍．粉紅電鋸 《Lollipop Chainsaw》

又玩《索女．喪屍．機關槍》條橋？新PS3 Game《Lollipop Chainsaw》就循住呢條Cult片方程式開發，高中啦啦隊隊長唔止拎起電鋸鋸喪屍，後期更可以將電鋸變成機關槍射喪屍添！呢套日系Cult Game唔單止玩血腥同性感，仲加入大量萌系設定，真係好毒！SCEH為咗宣傳遊戲，更特別請Jessica C. Cosplay女主角，果真入型入格，如果可以着埋遊戲中供 Unlock 嘅Bikini上陣就更正！

在發布會上，Jessica C.唔止揸鋸擺甫士，仲落場試玩過呢隻《Lollipop Chainsaw》，玩完猛讚Cool！這遊戲係由專出Cult Game嘅Grasshopper Manufacture製作人須田剛一領軍製作，結合美式Cult風格，加上日式萌系元素，怪雞得嚟都幾討好！故事講美國高中啦啦隊隊長Juliet同男友Nick喺學校調情，忽然成間學校嘅學生都變晒做喪屍襲擊佢哋，男友被咬就快變喪屍之際，Juliet就用把粉紅色電鋸鋸咗男友個頭出嚟，仲掛喺腰間通街走，口味極重！其實Nick個頭係有用o架，當見到遊戲入面出現嘅藍色無頭喪屍時，將男友頭安上去，就可以控制佢去做啲例如清除路障嘅粗重工作。

粉紅電鋸招式極萌

Juliet主要用嘅武器係一把粉紅電鋸，操作方法同其他動作遊戲差唔多，分普通攻擊同Charge攻擊，就啱角度同Timing，一嘢Charge攻擊就可以鋸甩喪屍個頭，好過普通攻擊鋸極都唔死，而且埋身角力時鬥撳掣贏出的話，可以由上至下將喪屍鋸成兩半。玩得咁上下，女角會學到更多Combo招式，把電鋸仲會變成機關槍。不過女角所使出嘅招式都好萌，唔係個個玩家頂得順，又踢腿、又倒立，仲要拎埋啦啦球出嚟，出招時又會出晒粉紅心心！

為女角換Bikini

查實遊戲畫面血花唔多，而且出場喪屍都唔算惡形惡相，而每關大佬都係同音樂有關，有玩Punk、Funk、Viking Metal同Rock'n'Roll等，鋸起嚟都幾Funny，不過就唔易打！除咗主線要喺課室、棒球場、垃圾場等戰場上打喪屍外，本作仲有向懷舊街機遊戲致敬嘅Mini Games，女角會置身好似《Pac Man》同《Lode Runner》嘅場景打喪屍添！遊戲衰在無得連線同人打，不過可以玩計分賽、金幣賽同競時賽，並可上載分數到排行榜，仲有得儲金幣買同動畫Crossover嘅靚衫幫Juliet換裝！據小道消息話，香港行版等同日本Premium版，有齊特典內容，即係話可以Unlock女角嘅女傭服同Bikini！

INFO

類型：動作

開發：Grasshopper Manufacture

平台：PS3

推出日期：今天

售價：$388

查詢：2341 2356