on.cc 東方互動主頁

Lumia 900無懼烈日

大熱天時，去沙灘玩兼用手機上載陽光靚相可以話係指定動作；不過在陽光直照下，好多手機屏幕都即時同你玩反白，左遮右掩依然睇得勁辛苦！Nokia剛推出的Lumia 900就特別備有4.3吋屏幕，不單止係Windows Phone中少見的大芒機，更支援ClearBlack技術，顯示黑位超實淨，最重要是有效降低屏幕反光，幾猛太陽都睇得清；配合800萬像素Carl Zeiss鏡頭以及最新的即影Tag功能，靚相就可以即影印上載！

Nokia自從上年10月尾於Nokia World推出兩部Windows Phone Lumia 800和710後，市場對WP的反應似乎有所改觀，仲有唔少朋友大讚呢兩部Lumia手機設計有Signature！今次新機Lumia 900就沿用Lumia 800的Form Factor，再換上大芒以及新版WP系統，硬件、功能都更趨完善，難怪會於CES 2012被Cnet評審為「Best of CES 2012」。

黑芒加大碼

第一眼睇Lumia 900，確實會同Lumia 800有所混淆；皆因兩者都採用一體成形的設計，物料仍然係聚碳酸酯，配合黑、白、藍三色外殼，外形、手感依舊討好！不同的是，新機AMOLED屏幕由3.7吋加大至4.3吋，雖然解像度維持800×480，不過因改用了RGB的顯示排列，令顯示細緻度大大提升，睇網頁細字尤其明顯！最重要是屏幕支援ClearBlack顯示，黑位比一般屏幕實淨，令光暗、顏色的對比更突出，而且大大減低屏幕反光情況，日頭煲劇抑或上網都唔使左遮右遮，零舍舒服！

影相即Tag即上載

有個靚芒，最適合用來取景影靚相；新機就特別內置800萬像素Carl Zeiss鏡頭，加上備有F2.2大光圈，成像有保證！影完靚相都要有渠道Share畀朋友至啱數，Lumia 900就將社交網絡好似Facebook的分享功能融入相機及相簿之內，唔使事先打開Facebook App，影完相再按下「分享」鍵就可以Tag相兼Upload；用家仲可以順勢更換埋Profile Picture，簡單易用勁方便！另外，瀏覽器Internet Explorer 9 Mobile亦同時支援分享功能，睇啱網頁撳個掣，即可以掟上Timeline或News Feed，鬥快Share肯定無得輸。

自家軟件大增值

Nokia自從成為Windows Phone「大戶」後，便不斷為旗下Lumia手機推出獨家Apps，其中不久前上架的《Nokia地圖》、《導航》，以及《公共運輸》就更係諾記撒手鐧。《Nokia地圖》提供190多個國家及地區的地圖資訊，亦可搵出附近的熱點；《Nokia導航》則支援離線汽車語音導航，更可預先下載超過110張國家地圖；而《Nokia公共運輸》就可以幫你搵到點對點的前往方法以及交通資料，其他Smartphone邊度有得比？加上升級至Windows Phone 7.5之後，網絡分享、繁體介面、中文手寫輸入等基本功能都愈來愈齊全；唯一美中不足是港版Lumia 900未如外國版般支援LTE制式，幸好都有42 Mbps HSDPA+補數，影響未算太大。