Officejet 4620慳得就慳

通脹年年升溫，無論大公司抑或SOHO族都一律要緊縮開支，好似打印文件呢類成本當然慳得就慳。最近HP就推出一部主打平價市場嘅Officejet噴墨打印機4620，機價一千元唔使，但就集雲端、打印、影印、掃描、傳真等五大功能於一身，性價比滿分，屋企、Office都合用！

Biz App照玩

Printer近年愈出愈平，有部分入門型號甚至幾舊水有找，不過功能相對較簡單。新機4620雖然都係走平價路線，不過就已經具備多合一打印機嘅大路功能，包括打印、掃描、傳真、影印等。最重要是新機同時支援埋HP ePrint Apps，好似填色遊戲《AOL Kids》、《功夫熊貓2》等卡通填色、摺紙遊戲嘅《Dreamworks》等等，好玩又過癮；就連屬商用系列嘅Biz App都有，包括提供多種表格範本嘅「HP快速表格」、每日新聞摘要嘅《Yahoo　Digest》以及《Financial Times》等等，唔經電腦就可以直接打印所需文件，方便又直接。

能源慳足40%

相比其他Officejet系列打印機，新機4620的體積明顯較細，擺位自然更靈活。雖然機仔細細，不過4620的每月打印量都有3,000頁，啱晒打印量唔高嘅Home User或者SOHO一族。而近年大家最關注嘅環保問題，新機都兼顧埋，內置Schedule On/Schedule Off功能，可以預設打印機開關時間，咁就唔驚收工唔記得熄機而嘥電費啦！官方仲話4620比一般打印機嘅能源成本少40%，確實慳電又環保。

同場加映：黑白玩Apps LaserJet Pro 400 MFP M425dw

咪睇M425dw只係一部黑白Laser機，查實佢係HP旗下第一部支援Print Apps嘅黑白雷射打印機。新機只要連接上網之後，就可以喺3.5吋篤芒下載以及使用Print Apps。此機的每月最高打印量亦高達50,000頁，加上機底備有250頁的入紙匣，日日狂印文件都頂得住！值得一提，M425dw亦備有打印、影印、掃描、傳真及數碼傳送等功能，更加入小型打印機罕見的One Pass自動雙面掃描功能，只需一次過紙程序，就會完成雙面掃描，方便Office一族。