《Max Payne 3》子彈時間玩大佢

話說，子彈時間（Bullet Time）係《Max Payne》系列首創，並啟發唔少遊戲都用上同類型嘅慢動作系統。上兩集《Max Payne》都已經係01年同03年嘅出品，到今個星期推出嘅《Max Payne 3》就將子彈時間玩大佢，除咗進化到擊殺特定區域最後一個敵人會變成Final-Kill Cam特寫之外，亦首次將子彈時間放入多人模式之中，視線內所有玩家都會被迫進入子彈時間，效果真係幾震撼！

避走聖保羅變大叔

《Max Payne 3》依然離唔開黑幫仇殺格局，但新作無論係班底同故事都改頭換面，好似主角Max Payne已經唔再喺紐約做警探，去咗巴西聖保羅過新生活，甚至由型仔Look變成光頭背心大叔Look，但型格招式依舊，拎起雙槍掃射同飛身掃射一樣身手敏捷。今集武器系統亦有啲似同屬Rockstar嘅《Red Dead Redemption》，可以帶兩支能單手操作嘅槍械，亦可帶同另一支雙手操作嘅重型槍械，經簡單輪換系統就可揀武器。

最後擊殺大特寫

主角今集轉行當有錢佬嘅私人保鏢，但聖保羅乃屬九反之地，主角嘅老闆係黑幫嘅目標，所以想像得到黑幫仇殺場面多不勝數。發動子彈時間可以令時間變慢，對住一大班敵人都可以慢慢瞄準再射，避開四方八面而來嘅子彈都容易咗，而且子彈時間用完後，可隨時間累積儲滿再用。《Max Payne 3》更將子彈時間模式引進到多人連線模式，只有發動子彈時間同佢視線內嘅玩家先會落入慢動作場景，至於地圖上其他玩家就可以正常速度廝殺，呢個系統夠晒創新！另外，只要擊殺特定區域內最後一個敵人，就會進入Final-Kill Cam狀態，會慢動作播放跟隨子彈同敵人中彈身亡嘅特寫鏡頭，好鬼有型！

結黨殺到落《GTA V》

如果主角中槍嘅話，《Max Payne 3》唔似其他射擊遊戲可以匿埋一陣自動補血，一定要食止痛藥先得；但妙在中槍後可以喺瀕死嘅狀態下擊殺射你嘅敵人，電腦仲會餵你食止痛藥補血添。單人模式可以慢慢嗒真故事，睇下主角點樣做低成千上萬嘅黑幫，但多人戰先係今次主打，最有趣嘅係Gang Wars模式，玩家們會分成兩大勢力互相廝殺，但下一波任務係會根據各隊表現而定出目標，好似上一波殺人最多嘅玩家會變成新一波嘅被獵殺對象，搶得多地盤嘅一方又可能要拆除自己地頭上嘅炸彈。系統更會幫玩家記錄大家嘅過節，而成為「Crew幫眾系統」，如果你做低同你有過節嘅幫眾成員會得到額外獎賞，呢套世仇式系統唔止可以在《Max Payne 3》用得着，仲可以帶埋落預定11月推出同由Rockstar開發嘅《GTA V》添！

INFO

類型：動作

開發：Rockstar Vancouver

平台：PS3、Xbox 360

推出日期：5月18日

售價：$469（PS3）、$429（Xbox 360）

查詢：2359 7998