動漫迷睇車 愈痛愈Like

細細個阿媽已經千叮萬囑：「過馬路要睇車呀！」呢番說話，相信日本嘅媽咪可以慳番，事關當地「痛車」文化當道，唔只賽車場，就連大街小巷都好易遇到貼滿動漫人物拉花嘅特色「痛車」，成架車身花喱花碌，唔使人提，自然都會望多兩眼，而且十之八九都係性感女角，宅男唔中招就假！嫌日本人「萌」毒太深，未必老幼咸宜？好彩我哋有麥兜、老夫子等正派代表，唔知相關嘅版權持有人可否大方啲，唔收錢畀本地車主級粉絲自行DIY「痛改」一番？成事嘅話，相信日後係「馬路如笑口」囉！

Dick Editor

辦大事有我

人有三急，遇上踎廁，但係又踎唔慣，咁可以點？不妨諗吓呢張收摺廁櫈，使用方法同大牌檔摺櫈一樣，但座墊就改為中開廁板，等大家遇上踎廁，都可以舒適辦事，更唔使擔心踎到腳痹。不過，若有「物件」從高處跌進水中，極有可能出現水花四濺的情況，隨時搞到一腳都係。雖然有創意，但仲有唔少改良空間囉！

Simon Reporter

現實版隨意門

家陣香港地會有成千上萬嘅指示牌，點明你嘅路向，不過若然遇着呢塊喺九龍東某座大廈嘅指示牌，就真係夠晒「老點」。事關佢好清楚咁話畀你聽點去「升降機門」，但從來無講過有「升降機」出現，莫非家陣靠道門就可以上樓落樓？係咪「隨意門」嚟o架？

地點：九龍東

Dennis Reporter

乜都唔准

「唔准」國家在哪？新加坡也。這個國家法律尺度嚴謹，旅客不准攜帶香煙入境，城內也找不到香口膠出售。那香港呢？有日我去到這個地方，抬頭一看，見到多條「規例」，捉棋、玩牌不可以，最重要是睡覺都不准，坐下來還以為身在北韓。大家估到這是甚麼地方嗎？其實是茶餐廳也，未知此等規例，是否由金先生制定嘅呢？

地點：香港

Samuel Reporter