APP士多：《3國小豬搲爆頭》盞鬼百萬富翁

電視節目《百萬富翁》相信唔少人都睇過，如果當年冇機會上電視贏大獎的話，新App《3國小豬搲爆頭》應該可以畀你重溫一下，同樣有十五條刁鑽問題考你，不過贏咗就冇錢袋，純粹得張「叻」字成績表，但勝在過癮！

港版問題

呢隻《3國小豬搲爆頭》玩法輕鬆，主角豬仔畫風得意，仲周不時有搞笑對白添！遊戲玩法同電視版一樣，共有十五條問題；亦因為遊戲由香港人開發，所以問題既刁鑽又夠地道，好似會問「屈機的意思是？」等等，幾抵死！

遊戲有三大錦囊畀你應急，分別係「50:50」、「網上投票」同埋「打電話問朋友」，其中最特別就係「打電話問朋友」，會有關羽義哥等四位朋友幫你解答問題；小記玩咗幾十次，覺得劉備大兄最準，大家不妨試吓。如果嫌問題未夠難又或者熟口熟面的話，遊戲仲提供兩大題庫畀你慢慢挑戰，話唔定可以增進學識。

支援平台：iOS 4.0或以上、AndroId 1.6

下載費用：免費

師傅有教：「聰明的人要喺適當時候扮蠢」，不過喺呢隻新App入面，你想懶醒都未必得！《愚蠢的測試》呢隻遊戲個名就夠晒低B，不過原來卻相當考智力，遊戲內提供多個既玩食字又玩邏輯的小遊戲，難度超高，隨時天才都玩唔掂！

遊戲原意就話要考你IQ，其實好多問題都唔係純考智力，而係考玩家睇唔睇得穿問題Tricky的地方，就好似「那個數字比較大？」其實係問你邊個數字的字體較大，隨時畀佢呃到！而且遊戲仲有限時，㩒錯答案的話會扣時間，玩法都幾緊張刺激。

面對極刁鑽的問題，亂按亂篤都未必拆解到，遊戲就畀你用10秒時間嚟換取提示；不過要留意，有時提示都未必啱，用來Brainstorm一下就無妨。不過遊戲貼心在每玩幾條就有一個中間檢查點，就算答錯咗都唔使由頭開始玩過！

支援平台：Android 2.2

下載費用：免費

《足球小將》入面，戴志偉就成日出絕招衝力射球，原來喺《Head Soccer》App入面一樣有得玩。遊戲介面、玩法都好簡單，限時內同對手鬥入波就得，過癮在可以儲分買特技，好似Dragon Shoot、Ice Shoot、Lightening Shoot等等，仲可以將對手射入網，殘忍得嚟都幾爽！

支援平台：iOS 4.1

下載費用：免費

類似《Dropbox》嘅網上儲存空間好多人都用緊，市場不知幾大；近日Google都話要分一杯羹，推出同類型軟件《Google Drive》，只要擁有Google帳戶就可有5GB空間畀你擺File，仲可以即時新增Doc、Spreadsheet等檔案，實用又方便。

支援平台：Android 2.1

下載費用：免費

天氣熱辣辣，最啱就係飲杯啤酒解吓悶，呢隻小遊戲《3D推啤酒！》就食正呢個啤酒熱。玩法好簡單，只要計啱力度將酒杯Drag前，令酒杯停喺指定區域就算成功，仲有唔少關卡，輕鬆又好玩！

支援平台：Android 2.2

下載費用：免費

話說餐廳話事人Irma去咗夏威夷度假，餐廳就交低咗畀加菲主人Jon，不過實際就係由加菲貓打骰。玩家就要幫加菲，要由食物、飲品各方面Serve好客人，加上畫面又夠晒繽紛，粉絲必玩！

支援平台：iOS

下載費用：免費

Vincent

答案都係四揀一，有啲問題絕對唔易答o架！