《Diablo III》 搶住恭迎魔王回歸

大收嘅遊戲通常兩、三年內就會出續集，但好似由《Diablo II》到《Diablo III》竟相隔超過10年，真係非常少見，所以好多機迷都餓咗好耐，下星期推出嘅《Diablo III》一早已大把人預訂！由上年9月開始測試，《Diablo III》無論介面設計、職業系統同畫面表現上，都畀到機迷好大信心，就算之前未玩過嘅新手，都好值得買套嚟進入「暗黑破壞神」嘅世界！

新職業系統男女齊上場

《Diablo III》故事架構都幾龐大，新手要搞清故事背境嘅來龍去脈都要花啲時間考究。今集故事大概講Diablo暗黑破壞神、Mephisto同Baal三大邪魔因為被火燄喚醒，再次要英雄出力降魔，三大邪魔之外，仲有多位次一級嘅邪魔，玩家就要喺五種職業中揀選一種，以進入呢場人魔大戰。跟上集唔同嘅係，今集野蠻人、巫醫、秘術師、武僧同狩魔獵人五種職業都有得揀選性別，女性玩家就唔怕畀殺氣騰騰嘅角色嚇怕。在取消技術樹系統下，玩家可以攜帶最多六個技能出戰，更且可透過符石系統轉換該技能的特性，可以衍生出獨一無二嘅屬性，可算是幾大膽創新嘅改動。

任務提示更加清晰

上集由於要交代劇情或者任務，因此有大堆文字要你睇；到《Diablo III》，系統設計得更人性化，NPC會用上語音交代同提示，唔使花太多時間聽角色訓示。另外今集值得一讚係提示更清晰，尤其喺上集經常要在開放式大地圖上搵目標，都幾難搞，今集在畫面右方就有提示同地圖話畀大家知應該點做，清楚指出任務的方向，要完成任務會相對容易咗。《Diablo III》另外亦加入動態任務設計，玩家每次進入遊戲後，系統都會自動產生唔同嘅地域，同有機會遇到NPC觸發新任務，就算重玩再重玩，都會遇到唔同嘅經驗。另一方面，敵人亦變得更聰明，識得運用地形去攻擊，譬如識得爬牆從上偷襲。

買Game前先Check電腦規格

《Diablo III》嘅電腦硬件需求唔算得話極高，但亦有一定要求，PC版嘅建議規格係Intel Core 2 Duo 2.4GHz或AMD Athlon 64 X2 5600+ 2.8GHz配NVIDIA GeForce 260或ATI Radeon HD 4870，只要部機唔係太舊，處理器方面其實唔難達標，但顯示卡就可能要Upgrade先得。至於Mac版建議配備就係行Intel Core 2 Duo、NVIDIA GeForce GT 330M或ATI Radeon HD 4670搭Mac OS X 10.7，Macbook Air、13吋Macbook Pro或者低檔Mac mini內置嘅Intel HD Graphics 3000都唔夠玩《Diablo III》。不過只要硬件到位，遊戲加上Havok物理引擎下嘅畫面效果都幾有水準，環境破壞場面都幾逼真。香港有賣嘅《Diablo III》分國際版同中文版，國際版雖然貴啲，但可以連上外國Server，而且功能會齊全啲，既然等咗咁耐，相信大家都唔會介意價錢貴少少。

類型：角色扮演

開發：Blizzard Entertainment

平台：PC、Mac

推出日期：5月15日

售價：$529（國際普通版）、$919（國際特別版）

查詢：2418 8896