城市獵人 HT 1/6 City Hunter Predator
石屎森林滿布危險，既有底褲色魔，又有僭建危樓，不過最危險都係樣衰到爆嘅血獸Predator！《Predator 2》之中，City Hunter Predator同黑人男主角由地鐵打到上太空船，將洛杉磯完全翻轉，劇情緊湊，被譽為史上最佳嘅外星人續集電影之一。向經典致敬，Hot Toys就決定推出新版「城市獵人」，無論頭雕、素體、武器都更加接近原作，加埋斷手及藥箱，誓要斬到玩家銀包流血不止！
執正條腰 煞氣返晒嚟
血獸一直都係HT嘅台柱系列，由第一集《 Predator》開始，只要有Figure 推出，都必定成為熱炒Items ，當中2008年推出嘅City Hunter Predator就係其中之一。不過當年技術尚未成熟，以致Figure頭重腳輕，兼有一條唔合襯嘅黃蜂腰，形象卡通咗，比唔上電影咁兇神惡煞，時至今日HT仲耿耿於懷。今次新版就改善晒以上問題，造型師Joesph Tsang第一步係改良素體，刪除腰部關節，令胸、腰連接得更自然，而且重繪蜥蜴花紋，配合新織嘅網衫，健碩身形返晒嚟。
新Gimmick 重現斷臂Look
頭雕都係重新製作，變得更加血腥猙獰，仲有開、合兩款口形，想幾兇有幾兇！不過頭盔表面過於粗糙，相反電影版就光滑得多，似乎唔多連戲喎！配件方面，有齊伸縮長矛、飛碟及金屬鋼爪，再追加藥箱、氧氣罩及斷手一隻，只要拆走素體原本嘅左前臂，再駁上斷手就搞掂，簡簡單單就重現被黑人男主角斬斷手一幕。另外，跟舊版一樣，新版亦有人類骸骨，而血獸本身就有六款造型手掌，可惜抽起咗異形頭骨，難免令可玩性打咗少少折扣。
圖中為試辦款式，與正式推出的版本或有若干分別。
HT 《Predator 2》 1/6 City HunterPredator
零售價︰$1,380
預售價︰$1,330
推出日期︰今年第四季
查詢：2388 4677（Toy Hunters）
頭盔表面太粗糙，同電影嘅光滑造型有出入。
有齊開、合兩款口形，只要拆除下顎骨就可以換件。
加送氧氣罩，但只適用於今次嘅新版血獸，其他Predator用唔番。
新版特製嘅斷手組件，一啪就可以駁上左臂。
藥箱可以打開，不過內藏嘅金屬儀器太細小，拆唔到落嚟。