中移動4G服務實地測試

今年各大網絡商都話會出4G，中國移動香港就「行動最實際」，正式推出4G LTE服務。話明叫第四代流動數據服務，速度當然比現有的3.5G網絡快得多，上載、下載的理論速度分別可以高達35Mbps以及100Mbps，下載Apps或者睇HD YouTube都唔使再慢慢等Loading，爽到暈！

高清串流唔使等

小記於尖沙咀的記招現場，即場以《通訊辦寬頻表現測試》App測試速度，發現下載速度竟然平均高達60Mbps，串流睇片當然唔使慢慢等，就連下載容量達25.75MB的遊戲《Temple Run》都唔使5秒就搞掂，隨時快過你屋企個Wi-Fi網絡！

另外，小記亦試過到葵興港鐵站、火炭馬場、大埔廣福邨三個地點再次測試，全程下載速度最慢亦達17.09Mbps，最快更試過38.88Mbps，表現合格！不過要留意的是，一旦手機收唔到LTE訊號，網絡會自動降回2.75g Edge，速度即時慢一截！好在中移動方面表示，預期今年年底，4G LTE網絡室外覆蓋率可達現有網絡的100%水平，室內覆蓋則可達80%水平，相信到時接收會穩定得多！

查詢：2945 8888