電話對答抵死又過癮

記得iPhone 4S一出，個個都爭住玩SIRI，玩到不亦樂乎，不過事隔一排，唔知係咪玩厭咗，定係好多人英文發音唔標準，呢個SIRI功能就沉寂晒。直至近期，大家又興玩類似SIRI嘅App，而最紅兼頻頻喺Facebook洗人版嘅，就係《SimSimi》喇！究竟呢類Apps有咩吸引之處，喺呢排又開始Hit番呢？即刻同大家解構吓。

港式辣雞《SimSimi》

做乜近排呢隻圓碌碌嘅雞仔咁鬼Hit呢？咪就係因為佢夠抵死囉！其實呢個App出了好一陣子，不過最近因為加入咗中文支援，同埋本身有個可以「教佢點答」嘅功能，所以雞仔識得有問必答之餘，啲答案仲鬼死咁啜核！有幾啜核呢？請自己試啦！而你鬧佢、佢又識得鬧番你轉頭，不過最抵死係，你同佢講：「36個字粗口」佢都可以答到你，問你死未！

話音狗狗《可以陪你聊天的機器人MM》

雖然隻雞仔咁大熱，不過始終都係打字問答，無論個答案幾咁令人驚喜，點玩都係得個睇字。你話若然好似SIRI咁齋講佢答就好喇！呢個《可以陪你聊天的機器人MM》就得喇，雖然佢係內地出品，所以只支援普通話對答，不過佢嘅對答一樣令人驚喜，係爭少少港式風味。最正係佢對答時會有各種古靈精怪嘅表情，如果佢識廣東話，咁就真係可以講句毫無破綻喇！

元祖腦人《Cleverbot》

App名講到明係Cleverbot，咁當然又係同電話對話啦！不過呢款都可以算係同類App嘅元祖，雖然時至今日呢款App仍然唔支援中文，不過大家用英文的話就語音抑或打字都可以辨認得到，而且因為推出已經有一段唔短嘅日子，所以對答方面會比較流暢。不過雖然佢打得又講得，無中文始終都係一個問題。

平台：iOS、Android

下載費用：iOS US$0.99、Android HK$8

私人秘書《Assistant》

都仲係覺得iOS個SIRI比較實用？試埋呢個《Assistant》先講啦！呢個App唔單止可以好似SIRI咁有問有答，兼幫你安排埋行程，就連睇地圖、搵朋友都可以靠佢搞掂，而且佢個介面比起冷冰冰嘅SIRI好得多，起碼可以畀你揀個人物做你對象，不論男或女、髮型服裝都可以隨自己喜好揀選，對住個自己設定嘅人物，畀佢煩住條氣都順啲啦！

平台：iOS、Android

下載費用：iOS US$0.99、Android 免費

外星朋友《Back Talk Free》

「Back Talk」就係代表頂嘴咁解，不過呢個App嘅主角外星人Izar就唔止同你頂嘴咁簡單，佢仲可以扮Tommy Cat幫你錄音出怪聲，同Izar觸控互動，甚至播放音樂讓Izar手舞足蹈亦得，真係想點玩就點玩！佢話晒係免費版本，就梗係有部分功能唔夠完整，不過總括嚟講都好過Tommy Cat齋玩聲咁悶。

平台：Android

下載費用：免費