廁世代玩意

大家嘅日常生活總離不開廁所：朝早起身例行公事、返工悶爆蛇王玩電話、吃完麻辣火鍋後山洪暴發……廁格看似平凡，其實係唔少人嘅私人小天地！點樣先可以令呢個小天地變得更有趣味？有人就惡搞咗一啲玩味非常嘅廁紙，等你喺廁所樂不思蜀！

Keith Reporter

山寨Free Woven

由Hiroshi Fujiwara（藤原浩）、Tinker Hatfield（Nike設計師）及Mark Parker（Nike CEO）三人所組成嘅HTM組合，以往曾推出過無數特別版波鞋，而當中玩藤織設計嘅Woven更係波鞋迷眼中嘅Dream Sneakers，對對都炒上天價。可能呢位內地波鞋迷恨Woven恨到發燒，所以決定自家製山寨版「Free Woven」，成本更只需70蚊人仔，當中已包括一對疑似「Free底」波鞋同用嚟織成鞋面嘅鞋帶，佢仲非常大方咁將整個過程完整示範，創意同手工都爆燈。

網址：http://bbs.hupu.com/3444657.html

Pasu Reporter

大眼妝Mini

依家啲女仔個個都化大眼妝，戴晒大眼Con兼黐晒長眼睫毛，估唔到汽車世界都興呢樣嘢！呢架泊喺瑞士蘇黎世河邊嘅Mini Cooper，一雙大眼仔車頭燈上面，就黐咗長長嘅眼睫毛裝飾，令雙眼睇落更大更明亮，仲令本來Man Man哋嘅銀灰色車仔即時變得嬌俏Kawaii。唔知喺香港咁搞法，會唔會觸犯交通條例呢？

地點：瑞士蘇黎世

Sanna Reporter

捷運臭豆腐

早前小記去咗台北食買玩，有日喺繁忙嘅台北捷運車站，離遠望到車站內竟然有地道臭豆腐同大腸麵線食咁神奇？再行近啲睇，原來只不過係迷你食物擺設畀乘客欣賞，順便宣傳台灣特色地道小食。個樣就整得似喇，但係說好了的臭味呢？

地點：台北

Kiki Reporter

恐怖蛋糕你敢食？

生日蛋糕又靚又好味，只係升斗小市民嘅主觀願望。最近網上就有人發布咗個蟑螂造型嘅蛋糕，像真度極高，心血少啲都見頭暈！咁都唔止，隨即就有人上載張用杏仁片做指甲的手指形麵包條，以及BB蛋糕，仲要一刀切開個頭顱……畀你知道入面係綠茶蛋糕餡。

Moe Reporter